Rusiyede artıq 93 koronavirus hastası bar.Bunı bazaertesi künü baş naziriniñ müavini Tatyana Golikova haber etti, bildire Azatlıq Radiosı.
Bir kün evel, resmiy malümatqa köre, Rusiyede 63 adise edi. Böylece, bir künniñ içinde koronavirus hastası 30 adamğa çoqlaştı, aman-aman bir yarım kere ziyadece oldı.
Rusiye prezidenti Vladimir Putin, koronavirus infektsiyanıñ tarqalmasınen küreşmek içün Rusiye devlet şurasınıñ iş gruppasınıñ teşkil etilmesi aqqında buyruqnı imzaladı. Onı Moskova reberi Sergey Sobânin baş etecek.
Daa evel haber etilgeni kibi, Rusiyede üç yañı COVID-19 koronavirus adisesi qayd etildi. Operativ ştatınıñ malümatına köre, koronavirus Belgorod, Kaliningrad ve Moskova vilâyetleriniñ sakinlerinde tapıldı.
Martnıñ 12-sinde Dünya sağlıq teşkilâtı koronavirus pandemiyasını ilân etti.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
