Dünyada yañı koronavirusnıñ tarqaluvı pandemiya olaraq tasvirlene bile.
Bunı Dünya sağlıq teşkilâtınıñ (DST) yolbaşçısı Tedros Gebreyyesus ayttı. «COVID-19 hastalığı pandemiya olaraq tanılmalı dep netice çıqardıq», – dedi o, dep haber ete Azatlıq Radiosı.
Gebreyyesusnıñ bildirgenine köre, yaqın künleri ve aftaları pandemiya tarqalğan memleketlerde COVID-19 hastaları ve ölümleriniñ sayısı artacağına azırlanmalı. Şimdi 109 devlette koronavirus yuqunçınen hastalanğanlar qayd etildi.
Rusiyede Hastalıq ile küreş operativ ştabı martnıñ 11-nde aqşam keçken künü memlekette daa sekiz yañı koronaviruslı hasta qayd etildi, hastalanğanlarnıñ sayısı 28-ge arttı, dep bildirdi. Altı hasta Moskvada, daa ekisi Moskva vilâyetinde qayd etildi. Soñki eki afta içinde İtaliyanı ziyaret etkenleri belli oldı. Hastalanğanlar infektsion qutularda buluna.
Ukraina baş naziri Denis Şmıgalniñ martnıñ 11-nde bildirgenine köre, memleket «İtaliyanen uçaq seferlerini toqtata». Onıñ aytqanına köre, qarar alındı ve ava şirketleri onı yerine ketirip başladı. Şmıgal, dünyada tarqalğan koronavirus sebebinden martnıñ 12-nden başlap Ukraina devlet sıñırını qısmen qapatacaq, dep bildirdi. Yarından başlap 219 keçiş noqtasından 49-ı çalışacaq.
Bugünki künde Ukrainada laboratoriyada tasdıqlanğan bir koronavirus hastası qayd etildi.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
