Rusiyede üç yañı COVID-19 koronavirus adisesi qayd etildi. Operativ ştatınıñ malümatına köre, koronavirus Belgorod, Kaliningrad ve Moskova vilâyetleriniñ sakinlerinde tapıldı, Rusiye matbuatına atıf etip haber ete Azatlıq Radiosı.
Bildirile ki, hastalanğanlar yaqında İtaliyadan qayttı.
Rusiyede koronavirus hastalarınıñ sayısı 17 oldı. Daa üç Rusiyeli "Diamond Princess" gemisinde hastalandı. Yaqında Moskova sakinini hastahanede çıqardılar, daa evel - eki qıtaylını, olarda koronavirus yanvarniñ soñunda tapılğan edi. Daa 14 adam tedaviylene.
Umumen dünyada 105 biñden ziyade koronavirus hastası qayd etildi. 3 600-den çoq adam öldi. Adiselerniñ çoqusı - Qıtayda, biñlerce - Cenübiy Koreya, İtaliya ve İranda. Almaniya, Frenskistan ve İspaniyada hastalarnıñ sayısı biñge yaqınlaşa.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
