Qırım ve Aqyardaki Rusiye cezalarnı yerine ketirüv federal hızmetiniñ idaresi, Aqmescitteki «Hizb ut-Tahrir davasınıñ» mabüsi Tofik Abdulgaziyevniñ qan zeerlenüvi yoq, dep bildire. Bu aqta Rusiye apishane vekilleri «İnterfaks» agentligine bildirdi.
«Kütleviy haber vastalarında şübheli Abdulgaziyevniñ Aqmescit SİZOsında qan zeerlenüvi oldı, dep haber etildi. Bu malümat kerçek degil, dep bildiremiz», – dep aytıla Rusiye cezalarnı yerine ketirüv federal hızmeti idaresiniñ matbuat hızmeti haberinde.
Berilgen malümatqa köre, 2019 senesi dekabrniñ 19-ndan berli Abdulgaziyev dava ekspertizası yapılğan №1 Balaban adına Qırım cumhuriyet psihiatrik hastahanesinde buluna.
Cezalarnı yerine ketirüv federal hızmetiniñ bildirgenine köre, «Aqmescitniñ tahqiqat izolâtorında bulunğanda Abdulgaziyev sağlıq vaziyetinden şikâyet etmedi».
Ukraina Yuqarı Radasınıñ insan aqları vekâletlisi Lüdmila Denisova, Aqmescit SİZOsında Aqmescitteki ekinci «Hizb ut-Tahrir davasınıñ» mabüsi Tofik Abdulgaziyevniñ qanı zeerlendi, dep haber etti.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
