Rostov vilâyetiniñ Şahtı şeer mahkemesiniñ qadısı Stanislav Malko Aqmescitteki ekinci «Hizb ut-Tahrir davasınıñ» mabüsleri İzzet Abdullayev, Tofik Abdulgaziyev, Yaşar Muyedinov ve Alim Karimovnıñ tevqif müddetini üç ayğa, avgustnıñ 15-ne qadar, uzattı, dep bildire Qırım.Aqiqat mühbiri.
Prokuratura ve tahqiqat dava mabüsleri tahqiqat izolâtorında tutulmalı, dep israr etti.
Olar dava mabüsleri azatlıqta olsa, «tahqiqat ve mahkemeden saqlana, şaatlarnı qorquza, delillerni yoq ete bile» ya da «cemaat telükesizligine zarar ketire bilecek qanunsız faaliyetnen oğraşmağa devam ete bile», dep bildirdi.
İmaye, SİZOda tutulmasınen bağlı olmağan er angi sıñırlav tedbiri, hususan yaşağan yerleri boyunca ev apsi berilmesini rica etti.
Oturışuv qapalı şekilde keçirildi, salonğa ne soy-soplar, ne diñleyiciler kirsetildi.
Tahminen 20 kişi dava mabüslerine qoltutmaq içün Qırımdan Şahtı şeerine keldi.
«Mahkeme salonına kirgende bizni politsiya hadimleri bekley edi, olar oturışuv qapalı olacaq dep, kirmege izin bermediler», – dep tarif etti Abdulgaziyevniñ ömür arqadaşı Aliye Kurtametova.
Bugün Rusiyeniñ Rostov vilâyetindeki mahkemelerde martnıñ 27-nde Qırımdaki kütleviy tintüvler neticesinde tutulğan Aqmescitteki ekinci «Hizb ut-Tahrir davasınıñ» mabüslerine qarşı oturışuvlar keçirile.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
