Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanesinde tutulğan daa bir qırımlığa tibbiy yardım kösterilmey, dep bildirdi.
«Rostov vilâyetindeki Rusiye cezalarnı yerine ketirüv federal hızmetiniñ SİZO 1-nde» tutulğan qırımtatarı Alim Karimovnıñ yüksek sıcağı köterildi, amma tibbiy yardım kösterilmey. Alim Karimovnıñ anginası oldı, üç künden berli sıcağı 39,5 derece», – dep yazdı Denisova Facebookta.
Onıñ aytqanına köre, SİZO memuriyeti qırımlığa kerekli tibbiy yardım köstermey ve ilâc bermey.
Ukraina ombudsmeni Rusiye İnsan aqları vekâletlisi Tatyana Moskalkovağa kene muracaat etip, «acele tedbir almasına» ve «tolu tibbiy tedqiq ve ihtisasiy tedaviylev yapılmasını temin etmesine» çağırdı.
Moskalkova ve apishane reberligi Denisovanıñ muracaatına daa cevap bermedi.
Bundan evel Denisova Rusiye apishanesinde tutulğan qırımlı Ayder Cepparovnıñ betinde şişik çıqtı, Aqmescit SİZOsında tutulğan Tofik Abdulgaziyevniñ qanı zeerlendi, dep bildirdi.
Alim Karimov – Aqmescitteki ekinci «Hizb ut-Tahrir davasınıñ» mabüsi. Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
