Link açıqlığı

Saatnıñ esas haberi

Rostov-na-Donu mahkemesiniñ ayatında video çıqarğan qırımlı faalge qarşı memuriy protokol tizildi


Qırımlı faal Valeriy Grigor
Qırımlı faal Valeriy Grigor

Aqmescitteki ekinci «Hizb ut-Tahrir davası» mabüsleriniñ apis müddetini uzatuv qabaat tarafınıñ muracaatı baqılğan Rostov-na-Donu Kirov rayon mahkemesiniñ ayatında video çıqarğan qırımlı faal Valeriy Grigorge qarşı memuriy cinayet protokolı tizildi. Bu aqta mahkemede olğan faaller Qırım.Aqiqat mühbirine bildirdi.

«Yanıma mahkeme vekili keldi, memuriy cinayet işlegeniñiz içün protokol tizilecek, dedi. Tizgenler, baqtım. Soñra eki şaat çağırıldı, red cevabımnı qayd etip yibergenler. Bir şey bozmadım», – dep tarif etti Grigor.

Memuriy dava Rostov-na-Donu mahkemesinde baqılacaq.

Faal Rusiye Memuriy cinayetler kodeksiniñ 17.3 maddesine istinaden (Mahkemelerniñ faaliyet nizamını temin etüv boyunca qadı ya da mahkeme vekiliniñ emrini yerine ketirmeme) qabaatlana.

Bugün Rusiyeniñ Rostov vilâyetindeki mahkemelerde martnıñ 27-nde Qırımdaki kütleviy tintüvler neticesinde tutulğan Aqmescitteki ekinci «Hizb ut-Tahrir davasınıñ» mabüslerine qarşı oturışuvlar keçirile.

Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.

Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.

OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.

Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG