Kündelikniñ devamı, başı mında.
Qayda: Rusiye, Rostov-na-Donu şeeri, Bölge arbiy mahkemesi, eski bina.
Ne vaqıt: 2021 senesi martnıñ 16, salı künü, saat 10:00-14:00.
Qadılar sert ediler. Reislik yapqan qadı Oleg Volkov biraz yorğun köründi, sanki hasta edi. Qadı buzqırğan kibi, oturışnı kim mında baş olğanını kösterip başladı.
Volkov bizim şahsiy malümatımıznı soray edi. Sözge soñki Bazarov Farhod çıqtı ve qırımtatar tilinde laf etmege istegenini bildirdi.
Qadı: «RF-da iş yürsetüv rus tilinde keçirile, rusça aytıñız, iş tertibini bozmañız, mahkeme qaidesi!» Farhod qırımtatarca aytmağa devam etti: «Menim halqım bar, ana tilimde laf etmege isteyim. Ne içün siz maña razılıq bermeysiñiz?!»
Bir qaç kere tenbilegen soñ qadı Farhodnı mahkeme zalından quvdı. Teneffüs vaqtında advokatlarnen nevbetteki mevamımıznı muzakere etip başladıq. Edem Semedlâyev er kesni qanaatlendirgen variant teklif etti: «Ballar, qadığa aytıñız ki, dostumıznı qanuniy aqqından marum etkeniñiz içün oña birdemlik bildirip biz de tuvğan qırımtatar tilimizde laf etecekmiz. Epimizni qavulay bilesiz!»
Öyle de yaptıq. İzetov Riza bizim mevamımıznı rus tilinde bildirdi ve qadını tenbiledi: «Siz cinayetdeş dep adlandırğanıñız dostumıznı keri qaytarmasañız ve oña terciman bermeseñiz, biz de onen beraber olıp, qırımtatar tilinde laf etecekmiz». Qadı bizim sözlerimizni körmemezlikke urdı ve oturışnı devam etti. Teneffüs vaqtında men Rizadan soradım: «Kim qazanacaq dep tüşünesiñ? Qadı teslim olurmı?»
«Bellesem yoq. Pek serttir», – dedi Riza.
Qadınıñ suallerine qırımtatar tilinde cevap berip başladıq. Volkov, sakince birini sorğuğa çekken soñ iç bir şey añlamayıp, devam etti ve digerini sorğuladı. Netice beklenilgen edi: «Mahkemelengenler mahkeme oturışınıñ qaidelerini bozğanı içün episini mahkeme zalından quvmaq». Bu qadınıñ qararı edi. Yüzlerimizde tebessüm köründi... Bizni quvaladılar. Biraz vaqıt keçken soñ konvoir dey: «Sizni mahkemege qaytaralar, şimdi ketecekmiz, azırlanıñız».
Nege çağırğanları añlaşılmadı. Kene akvariumğa keldik. Advokatlar, mahkeme oturışında bulunğanımız çoqqa sürmeycegini añlattılar. Biz mında mevam aqqında kelişmek içün. Kelüşüv devam etken zaman, davamıznı aydınlatmaq içün kelgen jurnalistlerge er kes ateşin tefsirler berip oldı. İzetov Riza: «Meni mında oturtqan er keske minnetdarım. Çünki tamam mında, apishanede men bir çoq şeyni añladım. Men islam qardaşlığı olğanına inandım, birlikniñ küçüni daa bir kere añladım». Raim jurnalistlerge apishanege nasıl tüşkenini, nasıl iskencelerge oğratılğanı aqqında aytıp berdi. Bazarov Farhod ve Ümerov Şaban qırımtatar tilinde iç bir şeyge baqmadan, olarğa destek köstermege devam etken halqımızğa minnetdarlıq bildirdiler.
Kene bir kişilik kameralarğa alıp kettiler. Men dua ettim. Biraz vaqıttan soñ oturış soñuna keldi. Biz olmadan!
Avtozaklarnen keri SİZO-ğa qayttıq. Allahqa şükür, bizim Aqmescit gruppamıznı ve Aluşta gruppasını avtozaknıñ bir bolügine oturttılar. Qırımdan dindaşlarımıznen beraber türlü mevzularda laf ettik. Aqşam saat 6-7-lerde biz SİZO-ğa qayttıq...
(Devamı bar)
Remzi Bekirov, Qırımlı siyasiy mabüs, vatandaş jurnalisti, uquq qoruyıcı teşkilâtlar tarafından siyasiy mabüs kibi tanılğan
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.