Link açıqlığı

Saatnıñ esas haberi

Remzi Bekirovnıñ mahkeme kündeligi: Aslı baqılacaq birinci oturışuv ögüne


Aqmescitteki ekinci «Hizb ut-Tahrir davasınıñ» mabüsi Remzi Bekirov Aqmescitteki rayon mahkemesiniñ oturışuvında, 2020 senesi fevralniñ 10-u
Aqmescitteki ekinci «Hizb ut-Tahrir davasınıñ» mabüsi Remzi Bekirov Aqmescitteki rayon mahkemesiniñ oturışuvında, 2020 senesi fevralniñ 10-u

Qırımlı siyasiy mabüs, «Aqmescitteki ekinci Hizb ut-Tahrir gruppası» mabüsiniñ kündeligi

Vatandaş jurnalisti ve «Qırım birdemliginiñ» faal iştirakçisi Remzi Bekirov 2019 senesi martnıñ 27-nde Qırımda apiske alınğan edi. O, Aqmescitteki ekinci «Hizb ut-Tahrir davasınıñ» mabüsi ola, bu davanıñ 25 mabüsi bar. «Hizb ut-Tahrir davası» boyunca apiske alınğan qırımlılarnıñ imayecileri olarnıñ taqibi diniy sebeplernen bağlı, dep tüşüne. Remzi Bekirovnıñ kündeligi bar, onıñ parçaları saytta derc etile.

Devamı, başı mında.

Yer: Rusiye, Rostov-na-Donu şeeri, Arbiy garnizon mahkemesi.

Vaqıt: 16.03.2021, salı, 10:00-14:00.

SİZOdan çıqamız. Niayet, Rostov-na-Donu şeerine keldik. Etap qolay olmadı, amma Allahqa şükür, er şey yahşı bitti. Rostovğa kelgende er kesniñ keyfi yerinde edi.

Martnıñ 16-nda saba dörtümiz – Riza [İzetov], Raim [Ayvazov], Şaban [Umerov] ve men – Rostovdaki SİZO-1-niñ «vokzalında» toplaştı. «Vokzal» – etapqa ketecek mabüsler toplanğan yer. Bir-birinen selâmlaşıp, sağlıq, al, SİZOdaki vaziyet ve ilâhre aqqında soradıq. Soñra standart tintüv oldı. Mında tezce keçe, çünki maden çerçive (metallodetektor – QA) bar.

Avtozakqa mindirip başladılar. Diger mabüslernen beraber, esasen 205-inci maddege istinaden apiske alınğanlarnen, arbiy mahkemeniñ oturışuvına kettik. Yol 15 daqqa devam etti. Mahkemege yaqınlaşqanda men mahkeme binasınıñ tanış çevre sızıqlarını kördim. Vatandan jurnalisti olıp bir vaqıtları mında çalışqan edim. Avtozaknıñ kiçik penceresinden yahşı baqtım, bizge qol tutmağa kelgen insanlarnı körmege tırıştım. Kimseni körmedim. Belki, başqa kirişten alıp ketkenleri içün.

Aqmescitteki ekinci «Hizb ut-Tahrir davasınıñ» mabüsleri Osman Arifmemetov ve Remzi Bekirov (soldan) mahkemede. Aqmescit, 2020 senesi fevral ayı
Aqmescitteki ekinci «Hizb ut-Tahrir davasınıñ» mabüsleri Osman Arifmemetov ve Remzi Bekirov (soldan) mahkemede. Aqmescit, 2020 senesi fevral ayı

Maşina toqtadı. Mahkeme binasına birer-birer kirsetip başladılar. «Qollar arqada, başlarıñıznı kötermeñiz, bir tarafqa baqmañız», – dep ayttı sert bir şekilde konvoycı, arqada qırçmalarnı qapatıp. Mahkeme kirişi ögünde konvoycılar ve polis tura edi. Mabüslerge diqqatlı baqıp tura ediler. Mahkeme binasına kirgenimizde bizni baqıp başladılar.

Qollarımız arqamızda bağlı olğanda tintüv yapılması şaşırttı. Qarmalap çıqqanlar, er şeyni baqqanlar. Pek yahşı is olmadı, özüni büyük cinayetçi olaraq is etesiñ. Kâğıt ve qalemlerden ğayrı, er şeyni – aş, taraq ve diger şeylerni – alıp, kiçik odalarğa qapatqanlar. Er birinde tek bir kişi tutulğan edi. Daa soñra Rostov şeerindeki SİZO№5-ten dostumız ve «qabaat ortağımız» Farhod [Bazarov] keldi. Onı tebessümlernen ve sesli «Assalâmu aleyküm» sözlerinen qarşıladıq. Onıñ alını, SİZOdaki şaraitlerni ve diger şeylerni soradıq.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

Yarım saattan soñ mahkeme oturışuvı salonına kirsetip başladılar. Er vaqıt kibi, «akvarium qafesine» qapatqanlar. Konvoy yolbaşçısı keldi, genç lâtif oğlan, mahkemedeki qaidelerni aytıp başladı: «Ayaqyolğa qadınıñ izninen ketemiz, muracaat etesiñiz ve raat ketesiñiz. Aş berecekmiz, qalğanı yasaq. Bütün vesiqalar başta hadimlerge berilecek, olar advokatlarğa yetkizecekler. Advokat ve diger insanlarnen qol tutuşmaymız. Selâm berecek olsañız – ellerni camğa tiygizesiñiz».

Aqmescitteki ekinci «Hizb ut-Tahrir davasınıñ» mabüsleri yazuvlı şiarlarınen. Ekinci sırada sağdan birincisi Remzi Bekirov, 2021 senesi mayıs ayı
Aqmescitteki ekinci «Hizb ut-Tahrir davasınıñ» mabüsleri yazuvlı şiarlarınen. Ekinci sırada sağdan birincisi Remzi Bekirov, 2021 senesi mayıs ayı

Aş sebebinden açuvlanıp başladıq: «Aşaycaq bir şey yoq, quru domuz eti!»

«Men bir şey yapıp olamayım. Sizden evel zeerlemeler oldı, şimdi qaideler sert, er yerde kameralar – er şeyni qayd eteler» – dep aytıp başladı konvoy yolbaşçısı.

«Qırımlılarnen çalışmağa begenem. Sizden evel bağçasaraylılar bar edi. Olarnen er şey güzel oldı. Oqumış, nezaketli insanlar, añlaşmalarımıznı bozmadılar», – dep ayttı üyken konvoycı. Diger hadim qoşuldı: «E, doğru. Gruppadan biri nasıl azat etilgeni aqlımda qaldı. Yarım saat qafeste yüre edi, dostlarını quçaqlap, çıqmağa istemegen edi! Şaştıq».

Salonğa advokat, prokuror, mahkeme hadimleri kirip başladı. Mahkeme salonını baqıp, prokurorğa diqqatnen baqıp, bunı endi körgen edim dep keldi. Tam eki yıl evelsi bu mahkemege, bu salonğa kelip, «Aqmescitniñ birinci beşinden» dostlarımnı qabaatlağan aynı prokurornı körgen edim. O vaqıt, 2019 senesi, jurnalist olaraq o mahkemeni aydınlatıp, prokurordan uzaq degil edim. Bugün ise qabaatlanıp, «akvarium qafesinde» otura edim.

Advokatlarnı körip, balalar pek quvandı. Canlı subetler başlandı: cinaiy dava, azatlıqtan kelgen haberler, qol tutmağa kelgen insanlar aqqında laflar oldı.

Advokat Mariya Eysmont meni körip, quvanıp ayttı: «Mennen beraber sizge qol tutmaq içün «Kotik» – Konstantin Kotov keldi. Ne yazıq ki, pandemiya sebebinden onı kirsetmediler». «Bizden selâmlar aytıñız. Lâqayt qalmağanı, destek köstergeni içün oña minnetdarmız!», – dep cevap berdim men Mariya Olegovnağa.

Advokat Mariya Eysmont
Advokat Mariya Eysmont

Ekseriyeti qadınlar olğan devlet advokatlarını körip, şaqacı Riza apansızdan şöyle dedi: «Meraqlı, bizni qorumaq içün qadınlar çağırıldı. Asılında erkekler qadınlarnı qoruy. Sizni quvana-quvana qorur edim… Yoq, sizni apiste körmege isteyim, dep tüşünmeñiz… sizni de quvanıp qorur edim», – dep devam etti Riza, mahkeme oturışuvınıñ kâtibine baqıp.

Er kesniñ keyfi güzel edi. 15-20 daqqadan mahkemege qadılar kirdi. Mahkeme başlandı…

(Devamı bar)

Remzi Bekirov, qırımlı bloger, vatandaş jurnalisti, aq qorçalayıcı teşkilâtlar tarafından siyasiy mabüs dep tanıldı

«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün

Qırımdaki «Hizb ut-Tahrir davaları»

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG