2019 yılınıñ soñki beş kününde Kyiv ve Rusiye tarafından idare etilgen "LDNR" boyevikleri arasında "esirler"niñ deñişimi yapılmalı. Aslında, taraflar utanıp qullanğan ifadelerni alıp taslasaq, "esirler"niñ deñişimi Kyiv ve Moskova arasında yapılacaq.
Bugün artıq bellidir ki, 2019 yılınıñ soñuna qadar deñiştirilecekler arasında vaqtınca işğal etilgen Qırımda yaşağan ve rus işğalciler tarafından azatlıqtan marum etilgen iç bir Ukraina vatandaşı olmaycaq.
Deñişim cedvelinde 65 qırımtatar siyasiy mabüsinden iç birisi yoq. - Olarnıñ arasında ise 2019 senesi dekabr 24-ünde Rusiye Yuqarı mahkemesi tarafından tüzetüv şiddetli rejim koloniyasında 16 yıl ve 6 ay, 12 yıl ve 6 ay, 13 yıl ve 6 ay apis cezasına maküm etilgen Teymur ve Üzeir Abdullayevler, Rustem İsmailov, şiddetli rejim koloniyasında 11 yıl ve 6 ay apis cezasına maküm etilgen Emil Cemadenov ve Ayder Saledinov bar.
Yaqında terrorcılıqta qabaatlanğan Ukraina vatanperveri Oleğ Prıhodko ve "mahkeme" qararınen areketleri sıñırlanğan Qırım jurnalisti Mıkola Semena kibi Qırım siyasiy mabüsleri olğan etnik ukrainler de azat etilmeycek.
Qayd eteyim ki, Ukraina prezidentiniñ Ofisi, vaqtınca ilhaq etilgen Qırımda qanunsız apis etilgen Ukraina vatandaslarınıñ azat etilmesiniñ başqa yol-usullarını tapmaq maqsadınen ne Qırımtatar Milliy Meclisinen, ne de Qırım siyasiy mabüsleriniñ tuvğanlarınen iç bir muzakere keçirmedi.
Ukraina tarafından aytışma iştirakçilerine Rusiye banditleriniñ delillerinen razı olmağa daa qolay edi: "Qırımnı laf etmeyik ve muzakere etmeymiz, anda olğanını - Rusiyeniñ iç işleridir".
Refat Cubarov, Qırımtatar Milliy Meclisiniñ reisi
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
(Facebooktaki Refat Çubarovnıñ esap yazısından tekrar neşir)
