Rusiye kontrolindeki Qırım Yuqarı mahkemesi dekabrniñ 19-nda Aqmescitteki ekinci «Hizb ut-Tahrir davasınıñ» dört mabüsini apiste qaldırdı, dep bildire Qırım.Aqiqat mühbiri.
Böylece, Rustem Şeyhaliyev, Osman Arifmemetov, Tofik Abdulgaziyev ve Seitveli Seytabdiyev 2020 senesi fevralniñ 15-ne qadar apiste qalacaqlar. Oturışuv qapalı oldı, Osman Arifmemetov ve Tofik Abdulgaziyev iştirak etmediler.
«Abdulgaziyev ve Şeyhaliyevniñ oturışuvı qapalı oldı, imayeniñ açıq mahkeme oturışuvı aqqında muracaatları red etildi. Abdulgaziyevni mahkemege ketirmegenler, bundan ğayrı, video konferentsiyası vastasınen iştirakini bile temin etmediler. Elbette, müvekkilimniñ imaye aqları bozuldı, dep sayam. Oturışuv müvekkilim olmasa keçirilmez dedim, amma bu muracaatım da red etildi. Neticede mahkeme tek video konferentsiyası vastasınen iştirak etken Rustem Şeyhaliyevnen oturışuv keçirdi», – dep tarif etti advokat Emil Kurbedinov.
Bundan ğayrı, onıñ aytqanına köre, mahkeme, Seitveli Seytabdiyevniñ mahkeme qararı seslendirilgende tuvğanlarınıñ kirmesine izin bermedi.
«Bugün Seytabdiyev ve Arifmemetovnıñ sıñırlav tedbirine qarşı şikâyetleri baqıldı. Oturışuv Arifmemetovsız keçirildi, o, psihiatrik hastahanede statsionar psihiatrik ekspertizada buluna. Oturışuv qapalı oldı, müvekkilim Seytabdiyevniñ mahkeme qararınıñ seslendirilüvine tuvğanlarınıñ kirsetilüvine dair muracaatı da red etildi, mahkeme Kiyev rayon mahkemesiniñ qararını deñiştirmeyip, Seytabdiyev ve Arifmemetovnı apiste qaldırdı», – dep qayd etti advokat İslâm Velilâyev.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
