Aqmescit civarındaki Dubki köyünde mayısnıñ 11-nde keçirilgen tintüv vaqtında Qırımda yaşağan Özbekistan vatandaşı Nabi (Ayub) Rahimov atıp öldürildi. Bu aqta Qırımtatar Milliy Meclisiniñ reisi Refat Çubarov ve aq qorçalayıcı, «Qırım birdemliginiñ» faali Lutfiye Zudiyeva bildireler.
«Aqmescitteki Dubki mikrorayonında yaşağan evinde musulman, özbek Ayub (Nabi) Rahimov atıp öldürildi. Tünevin onı Aqmescit rayonındaki Aq-Meçette iftarda körgenler. Tanışları ve qomşularınıñ aytqanına köre, erkek iftarlarğa aş pişirip para qazana edi. Quvetçilerniñ aytqanına köre, o, tintüv vaqtında tirendi, amma 80-den çoq qabaatsız insannı – qırımtatarını – apiske tıqtırğan insanlarğa inanmağa aşıqmayım», – dep yazdı Zudiyeva Facebook saifesinde.
Daa soñra bu malümatnı Refat Çubarov Facebookta canlı yayında tasdıqladı.
«Rahimov tutulğanda tirengen ve atıp öldürilgen eken. Yani FSB hadimleri tirengenini ayta. Öldürilgen Nabi Rahimovğa ait kibi tanıtılğan granata ve silâ parçalarını köstereler. Amma insanlarnı öldürgen FSB usullarını yahşı bilemiz. Silâ qoyalar ve öldürilgen «terrorist» ve «ekstremistke» ait olğanını aytalar», – dep bildire Çubarov.
O, Qırım işğali başlağanından böyle adise ilk sefer olğanını ayttı.
«İşğal başlağanından FSB hadimleri insanlarnıñ evine sürip kirse, olarnı öldürse ve silâ qoysa, soñra ise tirengenleri içün öldürilgenini aytqanlarını daa körmegen edik. Bu ilk oldı», – dep qayd etti Meclis reisi.
Refat Çubarov ve Lutfiye Zudiyevanıñ malümatına köre, Rahimovnıñ ömür arqadaşı Sahiba Burhanova ve 15 yaşında oğullarını alâ daa tapıp olamaylar.
«Qomşular ve köydeşler politsiyağa ömür arqadaşı ve 15 yaşında oğulları ğayıp olğanına dair arizalar bere», – dep qayd etti Zudiyeva.
«Qırım birdemligi» cemaat birleşmesiniñ Qırım.Aqiqatqa bildirgenine köre, saat 14:00-larda Dubki köyündeki evge ritual hızmet maşinası keldi. Qomşularnıñ faallerge tarif etkenine köre, saba erte quvetçiler keldi, soñra ateş sesleri eşitildi ve azbarda insanlar çapqaladı.
«Olarnıñ (Rusiye quvetçileriniñ – QA) aytqanına köre, onıñ (Rahimovnıñ – QA) silâsı bar edi, o, ateş açtı, RGD granatası bar edi. Tam olaraq bilmeymiz», – dedi birleşmege advokat İslâm Velilâyev.
Qırım uquq qoruyıcıları resmiy izaat bermey.
Qırım Muhtar Cumhuriyetiniñ prokuraturası Qırımda keçirilgen tintüv ve tutuvlarnen bağlı cinaiy tahqiqat başlattı.
Mayısnıñ 11-nde saba faaller Qırımda İçki rayonınıñ Yanış Taqıl (Zavetnoye) köyünde Ayub Rahimovnıñ evinde keçirilgen tintüv aqqında bildirdi.
«Qırım birdemligi» cemaat birleşmesi Qırım.Aqiqatqa bildirgenine köre, Aqmescit civarındaki Dubki köyünde daa bir tintüv başlandı. Tahminlerge köre, anda bu saba İçki rayonı Yanış Taqıl (Zavetnoye) köyündeki evinde tahqiqat tedbirleri keçirilgen Ayub Rahimov buluna bile.
İçki rayonındaki Rusiye İç işler nazirligi bölüginiñ migratsiya meseleleri bölügine alıp ketirilgen Sahiba Burhanovanıñ oğlu 15 yaşında Taqyuddin Yanış Taqıldaki evlerinde tedbirler yekünlendi, dep bildirdi.
Qırımlı jurnalist ve faallerniñ evlerinde keçirilgen tintüvler
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
