Aqmescit civarındaki Dubki qasabasında salı künü, mayısnıñ 11-nde, evlerden birinde daa bir tintüv başlandı. Tahminlerge köre, anda bu saba İçki rayonı Yanış Taqıl (Zavetnoye) köyündeki evinde tahqiqat tedbirleri keçirilgen Ayub Rahimov buluna bile. Bu aqta «Qırım birdemligi» cemaat birleşmesi Qırım.Aqiqatqa bildirdi.
İçki rayonındaki Rusiye İç işler nazirligi bölüginiñ migratsiya meseleleri bölügine alıp ketirilgen Sahiba Burhanovanıñ oğlu 15 yaşında Taqyuddin Yanış Taqıldaki evlerinde tedbirler yekünlendi, dep bildirdi.
«Kirip, anamnen selâmlaşqanlar. Soñra babamnı sorap başladılar. Soñra ev, aran, odalarnı tintin başladılar. Kenefke kirgenler. Ziyaret sebeplerini protokol soñunda yazıp seslendirgenler, amma men öyle de bir şey añlamadım. Protokol kopiyasını qaldırmağanlar. FSB çalıştı. Maddeni aytqanlar, amma añlamadım. Birisi keldi, pasportlarnı baqıp, İçkige barmaq kerek, dep ayttı. Ne içün aytmadılar. Anamnı alğanlar, men de baracam dedim. Qız qardaşım qorqtı», – dep ayttı Taqyuddin «Qırım birdemligine».
Qırımnıñ uquq qoruyıcı organları olıp keçkenlerni resmiy şekilde izaatlamay.
Qırımnıñ İçki rayonındaki Yanış Taqıl (Zavetnoye) köy sakininiñ evinde keçirilgen tintüv aqqında faaller mayısnıñ 11-nde saba haber etti.
Aprel ayınıñ soñunda Rusiye quvetçileri «Hizb ut-Tahrir davası» boyunca mahküm etilgenniñ qardaşı yaşağan evni tintti ve onı sorğuğa çekti, dep haber etilgen edi. Bundan evel Aqmescitniñ Hoşkeldi mikrorayonında Ruslan Ramazanovnıñ evini OMON sarıp aldı, quvetçiler terakt aqqında haber etildi dep tintüv keçirdi.
Qırımlı jurnalist ve faallerniñ evlerinde keçirilgen tintüvler
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
