Salı künü, mayısnıñ 11-nde, Rusiye quvetçileri Qırımnıñ İçki rayonınıñ Yanış Taqıl (Zavetnoye) köyüniñ yerli sakinlerinden biriniñ evinde tahqiqat tedbirlerini keçire. Bu aqta «Qırım birdemligi» birleşmesi Qırım.Aqiqatqa bildirdi.
«Ramazan ayına baqmadan, OMON hadimleri Rahimov Ayubnıñ evini tinte. Saibi evde yoq, apayı ve balaları bar. Böyle tahqiqat tedbirleriniñ sebebi belli degil», – dep bildire faaller.
Olarnıñ malümatına köre, ev yanında tahminen 15 quvetçi bulunğan eki «GAZel» tura. Ev saibi ve qorantası aqqında daa tafsilâtlı malümat yoq.
Qırımnıñ uquq qoruyıcı organları resmiy izaat bermey. Qırım.Aqiqat tafsilâtlı malümat almağa tırışa.
Aprel ayınıñ soñunda Rusiye quvetçileri «Hizb ut-Tahrir davası» boyunca mahküm etilgenniñ qardaşı yaşağan evni tintti ve onı sorğuğa çekti, dep haber etilgen edi. Bundan evel Aqmescitniñ Hoşkeldi mikrorayonında Ruslan Ramazanovnıñ evini OMON sarıp aldı, quvetçiler terakt aqqında haber etildi dep tintüv keçirdi.
Qırımlı jurnalist ve faallerniñ evlerinde keçirilgen tintüvler
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
