Rusiye quvetçileri aprelniñ 23-nde saba Aqmescitte Ruslan Ramazanovnıñ evini kelgen terakt haberleri sebebinden tintken eken, dep bildirdi qırımtatar faali ve aq qorçalayıcısı Abdureşit Cepparov Qırım.Aqiqatqa.
Onıñ aytqanına köre, tintüv saba saat 6-dan 7-ge qadar keçirildi.
«İç işler nazirliginiñ hadimleri tintüv protokolını qaldırdı, amma bir şey añlatmadı. O, (Ramazanov – QA) tintüv ne içün keçirilgenini bilmey. Ziyaret sebebi aqqında sualge olar 2020 senesi Ruslannıñ adresinden terakt aqqında haber etildi, amma terakt olmadı, dep cevap bergenler. Bilgisayarınıñ protsessorını alıp, daa soñra haber eterler, dep aytqanlar. Onı tiymediler, o, evdedir. Apayı ve dört balası bar, anası olarda, tintüv vaqtında yedi kişi ediler», – dedi Cepparov.
Aq qorçalayıcınıñ aytqanına köre, bu «tahqiqat tedbirleri» tünevin Bağça Eli (Bogatoye) köyünde olğanlarğa oşay. Cepparovnıñ fikirince, quvetçilerniñ ziyaret sebebi «tamamen uydurıldı».
«Men kelsem, anası yaramadı. Ruslan ne olğanını añlamay. Tintüv sebebini özleri (quvetçiler – QA) uydurğandır. Qarasuvbazar rayonınıñ Bağça Eli köyünde de buña oşağan bir şey oldı. Anda da altıda, aynı terkipte kelip tintüv keçirgenler, amma yerge yatqızıp, qollarını bağlamağan ediler. Tintüv sebebi aynı edi – terakt haberi. Anda eki planşet ve cep telefonı alındı, mında ise – bilgisayar protsessorı», – dep bildirdi faal.
Cepparov aprelniñ 23-nde saba Aqmescitniñ Hoşkeldi mikrorayonında Ruslan Ramazanovnıñ evini OMON sarıp aldı, tintüv keçirile, dep haber etti.
Qırımnıñ Rusiye quvet ve uquq qoruyıcı organları vaziyetni açıq şekilde izaatlamay.
Qarasuvbazar rayonınıñ Bağça Eli (Bogatoye) köyünde aprelniñ 22-nde saba qırımtatarı Eldar Fetlâyevniñ evinde «tahqiqat tedbirleri» keçirildi. Tintüv yarım saattan soñ bitti, kimse tutulmadı. Fetlâyevniñ evinde keçirilgen «tahqiqat tedbirleri» vaqtında tehnika (planşetler) ve CD-disk alındı, dep haber ete faaller.
FSB hadimleri salı künü, aprelniñ 20-nde, saat 14:00-da Qarasuvbazar rayonınıñ Qışlav (Kurskoye) köyünde qırımtatarı Seyran Taymazovnıñ evini tintmege keldi.
Aq qorçalayıcılarnıñ malümatına köre, Qırımda Rusiye quvetçileri üç ay içinde 126 qırımtatarını tuttı.
İnsan aqları Yuqarı komissarınıñ idaresi 2014 senesinden berli işğal etilgen Qırımda 43 insan, hususan dört qadın hırsızlanğanını qayd etti.
ABD Devlet departamenti martnıñ 30-nda 2020 senesiniñ insan aqları maruzasını derc etip, Rusiyeni Qırım yarımadasını işğal etkeni içün tenqit etti.
2020 senesiniñ insan aqları maruzasınıñ «Ukraina – Qırım» qısmında Rusiye işğal etken yarımadada «quvet qurulışlarınıñ suistimalları, insan hırsızlavları ve işkenceler» aqqında tarif etile.
Kreml, salı künü insan aqlarına riayet etüv aqqında maruzada derc etilgen ABD Devlet departamentiniñ Rusiyege qarşı hulâsalarınen razı olmağanını bildirdi.
Rusiye Tış işler naziri Sergey Lavrov işğal etilgen Qırımda insan aqlarınıñ bozuluvı aqqında laflar uydurıla, dep bildirgen edi.
Qırımlı jurnalist ve faallerniñ evlerinde keçirilgen tintüvler
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
