Aqmescit rayonınıñ Trudovoye köyünde Ernest Seytosmanovnıñ evini Rusiye quvetçileri tintti, onı ise FSB idaresine sorğuğa alıp ketkenler. Bu aqta «Qırım birdemligi» Qırım.Aqiqatqa bildirdi.
Faallerniñ aytqanına köre, Ernest «Hizb ut-Tahrir davası» boyunca 17 yıl sert rejimli koloniyada qalmasına üküm etilgen aqyarlı Enver Seytosmanovnıñ qardaşı ola.
«Qırımtatarınıñ evinde üçünci tintüv keçirile. Oña saba 6-da saba namazından soñ kelgenler, Ernest sabağace oturdı, çünki Ramazan ayında musulmanlar oraza tuta. Başta evde sesler eşitti, soñra bir kereden oda qapusı açıldı, ve odağa şaatlarnen beraber tahminen sekiz kişi kirdi. Telefon etmege ya da advokatqa tintüv aqqında bildirip yetiştirmedi. Seytosmanov bir özü yaşay», – dep bildire faaller Ernestniñ aytqanlarına esaslanıp.
Erkekniñ bildirgenine köre, «quvetçiler qollarını arqasında birleştirdi, üçü ayaqlarını tuttı, birisi boğucı şeklinde tuttı, şu sebepten yaramadı».
«Tahqiqatçı «endi bem-beyaz olğanını» aytıp, onı yibermege emir etti. Tahqiqat tedbirleri tahminen bir saat devam etti. Oña Rusiyede yasaqlanğan şeylerni çıqarmağa teklif etildi, Ernestniñ aytqanına köre, böyle bir şeyi yoq edi. Soñra quvetçiler protokolnı imzalamağa teklif etti, erkek buña razı olmadı», – dep haber ete «Qırım birdemligi».
Olarnıñ malümatına köre, tintüvden soñ Aqyardaki FSB binasında sorğu oldı, 6 saattan ziyade devam etti.
«Ernest özüne ve yaqınlarına qarşı şaatlıq etmemege imkân bergen Rusiye Anayasasınıñ 51-inci maddesine esaslandı. Sorğu mündericesini aydınlatmaycağına dair kâğıtnı imzalağan soñ onı yibergenler», – dep ayttı faallerge advokat Emil Kurbedinov.
Qırımdaki Rusiye uquq qoruyıcı organlarınıñ vekilleri bu tintüv ve sorğunı açıq sürette izaatlamay.
2019 senesi dekabrniñ 5-nde Rostov-na-Donu Cenübiy okrugı arbiy mahkemesiniñ qadıları Enver Seytosmanovğa üküm çıqardı. Onı Rusiyede yasaqlanğan «Hizb ut-Tahrir» teşkilâtı ile alâqaları bar olğanında qabaatlap, 17 yıl sert rejimli koloniyada qalmasına ve azatlığınıñ bir yılğa sıñırlanmasına üküm etkenler.
2020 senesi aprelniñ 16-nda Moskva vilâyeti Vlasiha şeeriniñ Arbiy istinaf mahkemesiniñ qadısı Anatoliy Solin Seytosmanovnıñ ükmüni deñiştirmedi. Ukraina Tış işler nazirligi narazılıq bildirdi.
«Memorial» aq qorçalayıcı merkezi Seytosmanovnı siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
