Fevralniñ 17-nde saba Qırımda Rusiye quvetçileriniñ musulmanlarnıñ (ekseriyeti qırımtatarı) evlerinde keçirgen tintüvleri Bağçasaraydaki ekinci «Hizb ut-Tahrir davası» çerçivesinde oldı. Bu aqta qırımlı advokat Lilâ Gemeci Qırım.Aqiqat Radiosınıñ yayınında ayttı.
«Tintüv vaqtında uquq qoruyıcılarnıñ aytqanlarından añlağanımızğa köre, Ernest İbragimov, Oleg Fedorov terror teşkilâtında iştirak etkeninde qabaatlana. Olar camide keçirilgen subette qabaatlana, bu ekinci Bağçasaray gruppasınıñ cinaiy mesüliyetke çekilmesi içün sebep oldı. Böylece, ekinci Bağçasaray gruppasınıñ davası on insanğa arttı», – dedi Gemeci.
Qalğan musulmanlar nede qabaatlana advokatlar daa bilmey. Lilâ Gemeci, qırımlılarnıñ evlerinde keçirilgen tintüv ve tutuvlarını olarnıñ faaliyetinen bağlay.
«Mahkeme ögünde keçirilgen barışıq aktsiyalarınıñ iştirakçileri ola. Semetdeşlerine qol tutmaq içün çıqqan, Qırımda farqlı bayram, tedbirlerni teşkil etken ediler. Bu faallikleri diqqatsız qalmadı», – dep qayd etti advokat.
Gemeci, tutulğan musulmanlar Qırımdaki Rusiye FSBsiniñ idaresine ketirile, dep bildirdi.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ evlerine keldi. Tahqiqat tedbirleri keçirilgende tutulğan insanlarnıñ tuvğanlarına berilgen malümatqa köre, olar Rusiye Ceza kodeksiniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – muar.) qabaatlana.
Qırım Muhtar Cumhuriyeti ve Aqyar prokuraturası fevralniñ 17-nde Qırımda keçirilgen kütleviy tintüvler sebebinden cinaiy tahqiqat başlatıldı, dep bildirdi.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
