Link açıqlığı

Saatnıñ esas haberi

Qırım Muhtar Cumhuriyetiniñ prokuraturası Qırımda keçirilgen kütleviy tintüvler sebebinden tahqiqat açılğanını bildire


Qırımda musulmanlarnıñ evleri tintile, 2021 senesi fevralniñ 17-si
Qırımda musulmanlarnıñ evleri tintile, 2021 senesi fevralniñ 17-si

Qırım Muhtar Cumhuriyeti ve Aqyar prokuraturası işğal etilgen Qırımda musulmanlarnıñ (ekseriyeti qırımtatarı) evlerinde keçirilgen kütleviy tintüvler sebebinden cinaiy tahqiqat başlattı.

«Ukraina Ceza kodeksiniñ 162-nci maddesiniñ 2-nci qısmı (mesken tiyilmemezligi) ve 146-ncı maddesiniñ 2-nci qısmına (azatlıqtan qanunsız marum etüv) istinaden açıldı. Mezkür qanunsız areketler içün beş yıl qadar apis cezası berilmesi mümkün», – dep aytıla prokuratura haberinde.

Mahkemeden evelki tahqiqat Qırım Muhtar Cumhuriyetindeki Milliy politsiyanıñ Qırım idaresi tarafından keçirile.

«Qırım birdemligi» birleşmesiniñ faalleri Qırım.Aqiqatqa bildirgenine köre, fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı) evlerine keldi.

Tahqiqat tedbirleri keçirilgende tutulğan insanlarnıñ tuvğanlarına berilgen malümatqa köre, olar Rusiye Ceza kodeksiniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – muar.) qabaatlana.

Rusiye quvet müessiseleri Qırımda fevralniñ 17-nde olıp keçken tintüvlerni ve tutuvlarnı açıq şekilde izaatlamay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

XS
SM
MD
LG