Qırımnıñ Qurman qasabasında mayısnıñ 18-nde qırımtatar milliy areketiniñ faalleri genotsid qurbanlarını añdı: hatıra taşına çeçek qoyıp, dua oqudılar.
Bu aqta qırımtatar faali Zair Smedlâ Qırım.Aqiqat mühbirine bildirdi. Onıñ aytqanına köre, tedbir Rusiye quvetçileriniñ nezareti altında keçti.
«Adet üzre dostlarımıznen toplaşıp, hatıra taşına kettik, çeçek qoydıq, dua oqudıq, imamlarımız «Yasin» oqudı. Elbette, küç qurulışları bar edi. Kimse belgilengen mesafeni bozmajı. Bizim içün sürgünlik yılları elâk olğanlarnı añmaq müimdir», – dep qayd etti Smedlâ.
Dua vaqtında faallerniñ arasında sanitar normalarına köre mesafe, betlerinde maska bar edi. Faqat Smedlâ özü maskasız edi, mayısnıñ 15-nde alğan tenbi vesiqasına esaslandı.
«Çoqusı maskada edi, amma meni betimni saqlamağa aqqım yoq dep tenbilegenleri içün aselet qanunğa riayet ettim, buyruqqa emiyet bermedim. Tenbi vesiqasında «Betni saqlamağa, hususan maska taqmağa ya da şahsiyetniñ belgilenüvine keder etken diger şeylerni qullanmağa yasaq etile», dep yazılğan. Bunı 2002 senesi iyülniñ 25-nde qabul etilgen 114 nomeralı qanun talap ete», – dep tarif etti Zair Smedlâ.
Dua Bağçasarayda da yapıldı, sanitar normalarına riayet etildi.
Ukraina prezidentiniñ Qırım Muhtar Cumhuriyetindeki daimiy temsilciligi qırımtatar halqı sürgünliginiñ qurbanlarını añıp, aktsiyada iştirak etmege davet ete. Daimiy vekil Anton Korınevıç qırımtatar bayraqlarını asıp, ölgenlerniñ hatırasına çıraq yaqmağa rica etti.
Mayısnıñ 18-nde Ukrainada qırımtatar halqı ile birdemlik aftası başlana – «Bir acı. Bir tarih». O, qırımtatar halqı genotsidiniñ yılına bağışlanğan bir sıra aq qorçalayıcı ve media leyhasından ibarettir.
Rusiye kontrolindeki Qırımnıñ milletlerara munasebetler Devlet komiteti bildirgenine köre, qırımtatar sürgünliginiñ yılına bağışlanğan er yıllıq «Qalbiñde ateş yaq» aktsiyası bu yıl koronavirus pandemiyası sebebinde online yapılacaq. Qırımnıñ Rusiye akimiyeti, COVID-19 sebebinden bütün sanitar normalarına riayet etip, hatıra abidelerine çeçekler qoyulacaq, dep bildirdi.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
