Sentâbrniñ 21-nde Rusiyeniñ nezaretinde olğan Qırım mahkemesi "gaz borusında diversiya davasınıñ" üç mabüsi – siyasetçi ve faal Nariman Celâl ve qırımtatar faalleri, ağa-qardaş Asan ve Aziz Ahtemovlarğa üküm çıqardı.
Nariman Celâl 700 biñ ruble cöreme ve 1,5 yıl müddetine azatlıqnıñ sıñırlanılması ile 17 yıl sert apis cezasına mahküm etildi.
Asan Ahtemov 500 biñ ruble cöreme ve 1 yıl müddetine azatlıqnıñ sıñırlanılması ile 15 yıl sert apis cezasına mahküm etildi.
Aziz Ahtemov 500 biñ ruble cöreme ve 1 yıl müddetine azatlıqnıñ sıñırlanılması ile 13 yıl sert apis cezasına mahküm etildi.
Rusiye qabaatlayıcısı faal Nariman Celâl ve qırımtatar faalleri, ağa-qardaş Asan ve Aziz Ahtemovlarnıñ 15 yıl koloniyada qalmasını talap etti.
Qırımtatar halqınıñ Milliy lideri Mustafa Cemilev Türkiye prezidenti Recep Tayyip Erdoğan ile qırımtatr faali ve siyasetçisi Nariman Celâlnıñ Rusiye apsinden azat etilmesi meselesini muzakere etemek niyetindedir.
Avgustnıñ 23-nde "Qırım platforması" halqara sammitiniñ iştirakçileri Rusiyeni tevqif etilgen qırımtatar siyasetçisi ve faali Nariman Celâlnı azat etmege çağırdılar.
Avropa Şurası Parlament Assambleyasınıñ 7 aza memlketinden 27 azası Ukayina Yuqarı Radasınıñ "Ukrayinanıñ işğal etilgen topraqlarında qırımtatarlarğa qarşı sürekli siyasiy taqipler" aqqında beyannamesini desteklegen. Olarnıñ arasında Estoniya, Letoniya, Almaniya, Daniya, Azerbaycan ve Poloniya. Bu sentâbrniñ 21-nde qanunsız mahküm etilecek Nariman Celâl ve eki doğmuş qardaşlar Aziz ve Asan Ahtemovlarnıñ qanunsız ükmüne bağışlanğan vesiqadır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
