Qırımtatar faali, Qırımtatar Milliy Meclisiniñ reis muavini Nariman Celâl yarımadadaki semetdeşlerine qırımtatar halqı genotsidiniñ yılına – mayısnıñ 18-ne – ev ve balkonlarda qara şeritli qırımtatar bayraqlarını asmağa teklif ete.
Bu aqta o, Qırım.Aqiqat mühbirine ayttı.
Celâlnıñ aytqanına köre, bu sene qırımtatar halqı genotsidiniñ yılına bağışlanğan tedbirlerniñ keçirilüvi koronavirus pandemiyasınen bağlı karantin sebebinden deñiştirile. O, semetdeşlerine muracaat etip, bu künni hatırlavlarğa bağışlap, sürgünlikni körgen insanlarnı ziyaret etmelerini rica etti.
«Semetdeşlerimizge muracaat etemiz, nasıl olsa da, mayısnıñ 18-nde özüni qırğınlıqqa qarşı vastalarnen temin etip, sotsial mesafege riayet etip, büyük gruppalarnen toplaşmayıp, qırımtatar halqı sürgünligine bağışlanğan hatıra yerleri, abide ve taşlarnı ziyaret etmek içün vaqıt tapmalarını rica etemiz. Çeçek qoyuñız ve dua etiñiz. Bu künni hatırlavlarğa bağışlamaq, belki, sürgünlikni körgen insanlarnı ziyaret etmek kerek, çoqusınıñ ana-babası yaqın yaşay», – dedi Nariman Celâl.
Faalniñ qayd etkenine köre, bu facialı künge bağışlanğan esas tedbir Kyivde azırlanğan online miting olacaqtır. İşğal altındaki Qırımda Rusiye kontrolindeki akimiyet de tedbirlerni azırlay, amma quvetçiler qırımtatar faallerini tenbilemege devam ete, dep bildirdi Celâl.
«Qırımda da resmiy akimiyetniñ desteginen tedbir teşkil etilecek. Amma, meselâ, Qırımda belli olğan bazı faallerge, Qırımtatar Milliy Qurultayınıñ delegatlarına prokuratura qanun bozulmaycağına dair, hususan ekstremist ya da açıq, kütleviy tedbir qanunları bozulmaycağına dair tenbi vesiqalarını berdi. Aynı vaqıtta, akimiyet «Qalbiñde ateş yaq» aktsiyasını keçirmege azırlana, meselâ. Yüksek seviyeli azırlıq rejimine baqmadan, eñ çoq 5 kişi hatıra yerini ziyaret etecek, bu aqta haberlerde aytıldı», – dep ayttı Celâl.
Onıñ malümatına köre, bu yıl mayısnıñ 18-i arfesinde gençler teşkil etken Çatırdağ seferi de olmaycaqtır.
«Formal yasaqlarğa baqmadan, çoqusı insanlar bu künde bazı tevsiye etilgen areketler yapar, dep ümüt etemiz, – sürgünlik yılları elâk olğanlarnı añar», – dep qayd etti Nariman Celâl.
Berilgen malümatqa köre, Rusiye prokuraturasınıñ hadimleri advokat Emine Avamileva, qırımtatar faalleri Nariman Celâl ve Zair Smedlâğa «ekstremizm qabul etilmeycegine» dair tenbi vesiqalarını berdi. Bunıñ kibi ihtarlar 60-tan çoq insanğa keldi. Aralarında advokat, aq qorçalayıcı, bir kişilik narazılıq aktsiyalarınıñ iştirakçileri, Qırımtatar Milliy Meclisiniñ azaları, «Qırım birdemliginiñ» faalleri bar.
Mayısnıñ 18-nde Ukrainada qırımtatar halqı ile birdemlik aftası başlana – «Bir acı. Bir tarih». O, qırımtatar halqı genotsidiniñ yılına bağışlanğan bir sıra aq qorçalayıcı ve media leyhasından ibarettir.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
