Qırımnıñ Rusiye sağlıq naziri İgor Çemodanov koronavirus qayd etilgen yedi insan qaysı şeerlerde yaşağanını bildirdi. Onıñ malümatına köre, dört hasta Yaltada yaşay, eki insan Aqmescitte ve daa bir kişi Kezlevde.
Bu aqta o, martnıñ 25-nde Qırımda koronavirus yuqunçınıñ tarqaluvına qarşı operativ ştabınıñ toplaşuvında bildirdi.
«Bugünge qadar Qırımda yedi insannıñ koronavirusı tasdıqlandı. Kezlevde hastalanğannıñ alı bir qarar. Dört yaltalı bar. Biriniñ pnevmoniyası bar. Fenalaşmay, amma sürekli hastalığı da bar. Diger qoranta azaları bir qarar. Aqmescitten de eki insan bar», – dedi Çemodanov.
Hatırlatamız, Qırım ve Aqyardaki Rospotrebnadzor idaresiniñ yolbaşçısı Natalya Penkovskaya, koronavirusnen hastalanğan eki qırımlı yarımadağa uçaqnen ve qomşu Rusiyede Keriç köprü üzerinden avtobuslarnen keldi, dep bildirdi.
Martnıñ 24-nde Rusiye kontrolindeki Qırım yolbaşçısı Sergey Aksenov Qırımda altı yañı koronavirus hastası qayd etildi, dep ilân etti. Daa evel Qırımnıñ Rusiye akimiyeti ilk COVID-19 hastası bar dep tasdıqladı.
Penkovskayanıñ bildirgenine köre, koronavirusnen hastalanğan qırımlı Qırım ve Herson vilâyetiniñ memuriy sıñırındaki Rusiye keçiş noqtasından keçkende Frenkistanğa barğanını gizledi.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
