Link açıqlığı

Saatnıñ esas haberi

Qırımda koronavirusnen hastalanğan daa altı insan qayd etildi – Aksenov


İşğal etilgen Qırımda koronavirus yuqunçına oğrağan altı yañı insan qayd etildi, dep bildire Rusiye kontrolindeki Qırım yolbaşçısı Sergey Aksenov.

Onıñ malümatına köre, hastalanğanlar koronavirus tapılğan memleketlerden qaytqan yarımada sakinleri ola.

«4 hasta – bir qorantanıñ azası, aile Birleşken Arap Emirliklerinde turistik kruizde edi, ve kruiz gemisinen seyaat etti. Daa 2 adise de ketirildi, hastalan Litvaniya ve Belçinı ziyaret etip cumhuriyetke keldi», – dep yazdı Aksenov Facebookta.

Onıñ qayd etkenine köre, hastalanğanlarnıñ diagnozları laboratoriyalarda tasdıqlandı. Qırımlılar yarımada hastahaneleriniñ yuqunç bölüklerine alındı ve ayrı bokslarda buluna.

«4 hastanıñ hastalıq alâmetleri yoq, olarnıñ hasta olğanı laboratoriyada belli oldı. Eki hastanıñ alı orta ağır olaraq qayd etile. Hastalar Sağlıq nazirliginiñ protokolına köre tedaviylene», – dep qoştı Aksenov.

Onıñ malümatına köre, alâqada olğan yaqınları yuqunç bölüklerine alındı, uzaqtan alâqada olğanlar yaşağan yerlerinde tibbiy közetüv altında izolâtsiyada buluna.

Martnıñ 24-nde Rospotrebnadzornıñ Qırım idaresi bildirgenine köre, işğal etilgen Qırımda ve Aqyarda yañı koronavirus hastaları qayd etilmedi.

Qırımnıñ Rusiye akimiyeti ilk COVID-19 hastası bar dep tasdıqladı. Yarımada akimiyeti birinci hastanen alâqada olğan 37 insannı taptı. Olar tibbiy müessiselerde ya da evlerinde tecrit etildi.

Rospotrebnadzor malümatına köre, koronavirusnen hastalanğan qırımlı Qırım ve Herson vilâyetiniñ memuriy sıñırındaki Rusiye keçiş noqtasından keçkende Frenkistanğa barğanını gizledi.

Qırım Muhtar Cumhuriyetiniñ Prokuraturası, Qırımnı işğal etken Rusiye yarımadada koronavirus yuqunçınıñ tarqaluvından mesüliyetli ola, dep bildire.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG