Link açıqlığı

Saatnıñ esas haberi

Aksenov: Qırımda ilk koronavirus hastası tasdıqlandı


Sergey Aksenov
Sergey Aksenov

İşğal etilgen Qırımda koronavirusnen hastalanğan ilk insan bar dep tasdıqladılar. Bu aqta Rusiye kontrolindeki Qırım yolbaşçısı Sergey Aksenov bildire.

«Qırım Cumhuriyetinde Frenkistandan kelgen yarımada sakininiñ koronavirus yuqunçı tasdıqlandı. O, Rusiye Federatsiyasınıñ devlet sıñırından maşina keçiş noqtasında keçti», – dep yazdı Aksenov Facebookta.

Onıñ malümatına köre, hastalanğan kişi koronavirus olğan memleketlerge barğanını aytmadı.

«Keskin nefes virus yuqunçı alâmetlerinen yaşağan yeri boyunca ve yuqunç telükesizligi tedbirlerine riayet etilip, tibbiy müessisege ayrı boksqa alındı. Netice tasdıqlandı. Hasta Sağlıq nazirliginiñ protokolına köre tedaviylene. Hastanıñ alı orta ağır», – dep qayd etti Aksenov.

Sergey Aksenovnıñ yazğanına köre, hastanıñ yarımadada alâqada olğan insanlar belli, olar izolâtsiyada buluna, tibbiy nezaret altında bulunalar, laborator tedqiqleri teşkil etildi.

«Qırğınlıqqa qarşı tedbirler tolusınen alındı. Regionda koronavirusnıñ tarqaluvına yol bermemek içün tedbirler alına. Vaziyet Qırım Cumhuriyetinde yañı koronavirus yuqunçınıñ tarqaluvına yol bermemek içün er kün çalışqan operativ ştabınıñ kontroli altında buluna. Cumhuriyetniñ bütün müessise ve teşkilâtları yüksek azırlıq rejimine köre çalışmağa devam ete», – dep qayd etti o.

Hatırlatamız, martnıñ 19-nda Qırımdaki Rospotrebnadzor idaresi, yarımadanıñ tibbiy müessiselerinde «telükeli memleketlerden keskin virus yuqunçı alâmetlerinen» 18 insan buluna, dep bildirgen edi.

Qırımda koronavirus şübhesi ile evde nezaret altında bulunğan insanlarnıñ sayısı arttı. Qırımnıñ Rusiye sağlıq naziri İgor Çemodanovnıñ malümatına köre, ekimler 286 insannıñ alını kontrol ete, 22 insan hastahanelerde buluna.

Aqyarda martnıñ 21-nde 11 hasta infektsion hastahanede tibbiy nezaret altında buluna, 123 insan evde nezaret altında qala.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG