Link açıqlığı

Saatnıñ esas haberi

Qırım mevzusı Rusiye içün «ceennem» olmalı – Ukraina Tış işler naziri


Dmıtro Kuleba
Dmıtro Kuleba

Ukraina Tış işler naziri Dmıtro Kulebanıñ fikirince, Qırımnı işğalden qurtaruv mevzusı yarımadanı işğal etken Rusiye içün «ceennem» olmalı. Bu aqta o, «TSN» içün bergen intervyüsında ayttı.

«Qırım mevzusı Rusiye içün aziz degil, ceennem olmalı, bunı da yaparmız. Bunıñ içün endi çoq şey yaptıq. Bunı bileler, çekişeler. Bu teşebbüske ne qadar açuvlanğanlarını çeşit yerlerden eşitem. Qırım platformasına qol tutuv diger memleketler içün siyasiy saylav meselesi olğanını tüşünem. Amma bu uquqiy ve ahlâqiy mesele ola. Çünki Avropada toprağınıñ qanunsız ilhaqını toqtatmağa tırışqan memleketke qol tutmamaq mümkün degil», – dep añlattı Kuleba.

Onıñ qayd etkenine köre, «bu emsalsiz keys».

«Kerçekniñ eki yüz fayızı da er bir ceetten bizim tarafımızdadır. Şunıñ içün bu mesele printsipial ola. Ukraina cemaatı Qırım platformasına qol tuta. «Nova Yevropa» merkezi sorav keçirdi, bu raqam pek belli. Halqara ortaqlarnıñ Qırım platformasına müsbet baqqanını begenem», – dep qoştı nazir.

Kuleba Internationale Politik Almaniya neşirine intervyü berip, müessise Qırım ve Donbasnen bağlı muzakereler içün «kreativ usullarnı» qıdıra ve Ukraina öz toprağından bir vaqıt vazgeçmeycek, dep qad etti.

Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.

Ukraina Tış işler nazirligi Qırımnı işğalden qurtaruv sammitini Kyivde 2021 senesi mayısta keçirmege planlaştıralar, dep bildirgen edi.

Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.

Rusiye kontrolindeki Qırım yolbaşçısı Sergey Aksenov emin ki, yañı halqara meydançıqnıñ quruluvı «Qırımnı qaytarmağa» yardım etmeycek.

Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.

2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.

Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.

Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.

2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.

Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.

Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.

XS
SM
MD
LG