Link açıqlığı

Saatnıñ esas haberi

«Qurşunğa tizüv taqlit etildi». Aqmescit mahkemesinde qırımtatar faali Ayvazov oğrağan işkence aqqında tarif etti


Raim Ayvazov qorantasınen (arhiv fotoresimi)
Raim Ayvazov qorantasınen (arhiv fotoresimi)

Aqmescitteki «Hizb ut-Tahrir davası» boyunca qabaatlanğan qırımtatar faali Raim Ayvazov Rusiye uquq qoruyıcıları onı Qırımnıñ memuriy sıñırındaki Kalançak keçiş noqtasında tutıp, «gece çölge çıqarğanını» ve «qurşunğa tizüvni taqlit etkenlerini» tarif etti. Bu aqta advokatı Mariya Eysmont Qırım.Aqiqat mühbirine bildirdi.

Bunı Ayvazov Kreml kontrolindeki Aqmescitniñ Kiyev rayon mahkemesiniñ SİZOda tutuv müddetini uzatuv meselesi baqılğan oturışuvda aydınlattı.

«Qayda ve nasıl tutulğanına dair sualge Ayvazov gece saat 2-3-lerde onı keçiş noqtasından yibermey ediler, dedi. Daa soñra, onıñ fikirince, üç FSB hadimi onı nomeraları qapatılğan maşinağa mindirip (urıp), çölge alıp ketti. Anda topraqqa tizlerine oturtıp, qurşunğa tizüvni taqlit etkenler – onıñ yanında ateş açqanlar. Bundan soñ FSB idaresine ketirip, tutulğanını vesiqalar boyunca resmiyleştirgenler», – dep tarif etti müvekkiliniñ aytqanlarını Eysmont.

Advokat, Ayvazovnıñ aytqanlarında cinayet alâmetleri qayd etile dep, tahqiqat organlarına qarşı şahsiy qarar çıqarılmasını rica etti. İmaye cinayet aqqında ariza bermege de istey.

Kreml kontrolindeki Aqmescitniñ Kiyev rayon mahkemesi Ayvazovnı avgustnıñ 15-ne qadar SİZOda qaldırdı. Oturışuv qapalı oldı: ne tuvğanları, ne diñleyiciler içeri alınmadı.

Bavurçı (Kamenka) qasabasınıñ sakini, qırımtatar faali Raim Ayvazov aprelniñ 17-nde gece Qırım ve esas Ukraina memuriy sıñırından keçkende ğayıp oldı. Tuvğanları onı qıdırmağa ketti, dep haber etilgen edi.

Aprelniñ 17-nde kündüz Ayvazov tuvğanlarınen bağlandı. Raim Ayvazov 205.5 maddesiniñ 2-nci qısmına (terrorist tanılğan teşkilâtnıñ faaliyetinde iştirak etüv) istinaden qabaatlanğanını ve «Aqmescitteki ekinci Hizb ut-Tahrir davasınıñ» erkânına qoşulğanını qız qardaşına telefonda haber etti.

«Qırım birdemliginiñ» malümatına köre, Raim Ayvazov Qırımda apiske alınğan qırımtatar faallerine Rostov-na-Donuğa aş ve urba yollamaqnen oğraşa edi.

Qırımdaki FSB ve Rusiye sıñır idaresiniñ hadimleri Rusiyede yasaqlanğan «Hizb ut-Tahrir» teşkilâtınıñ faaliyetinde iştirak etkeninden şübheli sayılğan kişi tutuldı, dep bildire.

Bu dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.

OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.

Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG