Bavurçı (Kamenka) qasabasınıñ sakini, qırımtatar faali Raim Ayvazov gece esas Ukrainanıñ memuriy sıñırından keçkende ğayıp oldı. Soñki sefer gece saat 3-te apayınen bağğa çıqqan edi. Bu aqta «Qırım birdemligi» cemaat birleşmesi aprelniñ 17-nde Facebookta bildire.
«Ğayıp olğan kişiniñ ömür arqadaşı bildirgenine köre, aqayından soñki mesac gece keldi. Anda onı tutıp, ileri yibermegenleri, çünki «subet içün insannı» bekleyler, dep yazılğan edi. Soñki sefer Raim Ayvazov gece saat 3-te bağğa çıqtı. Şimdi cep telefonı «qapalı», – dep aytıla haberde.
Qırımdaki Rusiye FSBsiniñ sıñır idaresi Raim Ayvazov aqqında bir de bir malümat bermedi. Qorantası politsiya ve prokuraturağa insan hırsızlanğanına dair ariza berdi.
«Qırım birdemliginiñ» malümatına köre, Raim Ayvazov Qırımda apiske alınğan qırımtatar faallerine Rostov-na-Donuğa aş ve urba yollamaqnen oğraşa edi.
Qırım işğalinden soñ yarımadada insanlar, hususan qırımtatarlar sıq-sıq hırsızlanıp başlandı. Qırımdaki Rusiye Tahqiqat komiteti ise «yarımadada qırımtatarlarnıñ kütleviy ğayıp oluvı yoq», dep israr ete.
Faallerniñ bildirgenine köre, Rusiyeniñ Qırım işğali devamında 44 qırımlı ğayıp oldı, 15-i alâ daa ğayıp olğan kişi olaraq sayılmaqta.
