Gece ğayıp olğan qırımtatar faali Raim Ayvazovnıñ soy-sopları ve dostları Qırım ve esas Ukrainanıñ memuriy sıñırına onı qıdırmağa ketti. Bu aqta «Qırım birdemligi» cemaat birleşmesi Facebookta bildire.
«Saat 11:45. Raim Ayvazovnı tapmaq içün tuvğanları ve dostları memuriy sıñırğa yol ala. Rusiye keçiş noqtasında tutulğan qırımtatar faali «Kalançak» Ukraina keçiş noqtasından alâ daa keçmedi. Tutulğanından 12 saat keçti. Onıñ bulunğan yeri alâ daa belli degil», – dep aytıla haberde.
Bavurçı (Kamenka) qasabasınıñ sakini, qırımtatar faali Raim Ayvazov gece esas Ukrainanıñ memuriy sıñırından keçkende ğayıp oldı. Soñki sefer gece saat 3-te apayınen bağğa çıqqan edi.
Qırımdaki Rusiye FSBsiniñ sıñır idaresi Raim Ayvazov aqqında bir de bir malümat bermedi. Qorantası politsiya ve prokuraturağa insan hırsızlanğanına dair ariza berdi.
«Qırım birdemliginiñ» malümatına köre, Raim Ayvazov Qırımda apiske alınğan qırımtatar faallerine Rostov-na-Donuğa aş ve urba yollamaqnen oğraşa edi.
Qırım işğalinden soñ yarımadada insanlar, hususan qırımtatarlar sıq-sıq hırsızlanıp başlandı. Qırımdaki Rusiye Tahqiqat komiteti ise «yarımadada qırımtatarlarnıñ kütleviy ğayıp oluvı yoq», dep israr ete.
Faallerniñ bildirgenine köre, Rusiyeniñ Qırım işğali devamında 44 qırımlı ğayıp oldı, 15-i alâ daa ğayıp olğan kişi olaraq sayılmaqta.
