Qırımnıñ Qurman rayonınıñ qadın faalleri qırımtatarlarğa qarşı basqı ve iskencelerni toqtatmağa talap ettiler, dep haber ete "Qırım birdemligi" cemaat birleşmesi.
"Biz mında oğlanlarımızğa qarşı etilgen qılınuvlarğa ve çekiştirüvlerge qatiy "yoq" demek içün toplaştıq. Oğlanlarımıznı ikencege oğratıp, siz olarnıñ analarını, kiçik balalarını çekiştiresiz", - dedi siyasiy mabüs Riza İzetovnıñ anası Nadiye İzetova.
Haber etile ki, qadınlar qırımtatar faali Nariman Ametov ile olıp keçken "qanunsızlıq"nı körip açuvlılar.
Qırımtatar halqınıñ aqsaqalları qırımtatarlarğa qarşı işkence ve repressiyalarnı toqtatmağa talap etken edi.
Dekabrniñ 17-nde saba Eski Qırımda Rusiye quvetçileri qırımtatarı Nariman Ametovnıñ evini tintti. O, tutuldı, onı belli olmağan yerge alıp kettiler. Narimannıñ ömür arqadaşı Elmaz Ametova, aqayı qırımtatar faalleri Nariman Celâl ve ağa-qardaş Ahtemovlar qabaatlanğan Anğara köyünde «gaz borusındaki diversiyağa» alâqası bar olğanından şübheli sayıla, dep bildirdi. Advokatlar bu malümatnı tasdıqlamay. Soñra faaller «Ametovnıñ bulunğan yeri belli degil», dep bildirdi. O künü Ametov evine qayttı. Soñra FSB hadimleri tarafından elektrik aqımı vastasınen işkencege oğratıldı, dep bildirdi.
Qırım Muhtar Cumhuriyetiniñ prokuraturası Ametovğa qarşı işkence qullanılğanına dair malümat sebebinden qanun ve cenk adetleriniñ bozuluvınen (Ukraina Ceza kodeksiniñ 438-inci maddesiniñ 1-inci qısmı) bağlı cinaiy tahqiqat başlattı.
Rusiye FSBsi Nariman Ametovnıñ işkencege oğratılğanını tefsir etmey.
