AQMESCİT – Qırım yarımadasında Rusiye kontrolindeki akimiyet Qırımnıñ Rusiye yolbaşçısı kontrolindeki «Qırımtatar şurasınıñ» beş yıllıq işinde «Qırımda milletlerara uzlaşuv oldı», dep bildire. Bu teşkilâtnıñ faaliyetine mustaqil qırımtatar faalleri nasıl qıymet kese, Qırım.Aqiqatnıñ maqalesinde oquñız.
Qırımnıñ Rusiye yolbaşçısı Sergey Aksenov martnıñ 6-nda olıp keçken toplaşuvda azaları «vatandaşlarnen işte faal iştirak ete, «mahsus arbiy operatsiyanıñ» (Rusiyede Ukrayına ile büyük cenkni böyle adlandıralar – QA) iştirakçileri içün gumanitar yardım toplay, dep ayttı.
Fevzi Yakubov Qırım müendislik pedagogika universitetiniñ rektorı, Rusiye kontrolindeki «Qırımtatar şurasınıñ» reis muavini Çingiz Yakubov bu teşkilâtnıñ azaları «arbiylerniñ qorantalarına yardım ete, «mahsus arbiy operatsiyada» yahşı neticeler köstergen askerlerniñ hatırasını ebediyleştirüv işini yapa», dep ayttı.
Bir vaqıtları Qırım Muhtar Cumhuriyetiniñ millitlerara munasebetler ve sürgün etilgen vatandaşlarnıñ işleri komitetiniñ reberi olğan qırımlı faal Edem Dudakov bu şura erkânına tek Kremlge qoltutqanlar kirdi, dep ayttı Qırım.Aqiqatqa.
Bu shema bütün imperiyalarda yüz yıllarnen çalıştıEdem Dudakov
«Klassik bir shema – sıq-sıq yapılğan tutuvlar, diger repressiyalardan soñ «qoltutuvnı» köstermek içün özleri tayin etken «halq vekillerini» toplamaqnıñ tam vaqtı. Bu shema bütün imperiyalarda yüz yıllarnen çalıştı. Soyum olğan Lenur Urkumet sabadan gece birge qadar, bütün qanunlarğa zıt bir şekilde poligrafqa razı olğanına qadar, FSB ofisinde tutuldı. Bu toplaşuvda birisi bu aqta aytar edimi? Millet mensüpligine köre tintüvler keçirildi ve insanlar tutuldı dep aytar edimi? Yoq. Etnik ceetten er şey böyle çalışa. Halqımıznıñ ruslaştırıluvı böyle kete. Amma bu aqta da «temsilciler» yolbaşçılarına aytmazlar», – dep tarif etti faali.
Ukrayına prezidentiniñ Qırım Muhtar Cumhuriyetindeki daimiy temsilciliginde iş tecribesi olğan #LiberateCrimea halqara areketiniñ faali Ruslan Seydametovnıñ fikirince, qırımtatarlar Qırımda bu teşkilâtnıñ azalarından «uzaq olmağa tırışa».
Qırımtatarlar oña nasıl qıymet kese? Olğanı kibi – işğalcilerniñ yardımcıları kirgen qurulışqa kibiRuslan Seydametov
«Ukrayınağa qoltutqan qırımtatar halqı Aksenov reisliginde «Qırımtatar şurasınıñ» faaliyetine nasıl qıymet kese bile? Bu millet mensüpligine köre satqınlar toplanğan işğalci qurulışlarnıñ bir qısmı ola. Onıñ faaliyeti Qırımnıñ Rusiye işğaline qoltutuv propagandası, Rusiye başlatqan cenkniñ propagandası içün bar. Qırımtatarlar oña nasıl qıymet kese? Olğanı kibi – işğalcilerniñ yardımcıları kirgen qurulışqa kibi. Anda bulunğanlarınıñ sebepleri endi ekinci dereceli. Halqımız er şey añlay, ve bu etapta bu insanlarda uzaq tura. Qırım işğalden azat etilgen soñ olarğa lâyıq sualler berilecek», – dep izaatladı vaziyetni Qırım.Aqiqatqa faal.
Qırımda nam qazanğan artist, faal Gülsum Tamaq Qırım.Aqiqatqa izaat berip, Qırımda Rusiye akimiyeti ve onıñ kontroli altında bulunğan erbapları ne dese desin, qırımtatarlar Qırımnıñ Ukrayına kontroli altına qaytmasını bekley, dep qayd etti.
«Bilem, çoqusı qırımtatarı Ukrayınağa qaytacağını bekley. Sır degil ki, tamır halqnı çıqarıp, Rusiye Federatsiyasınıñ depressiv regionlarından kelgen ya da arbiylerni yerleştirmege tırışalar. Qırımda milletlerara bir añlaşma körmeyim. Bir qaç işbirlikçi qırımtatar halqınıñ tanılğan liderleriniñ yerini alıp olamaz. Belli işbirlikçiler «rus dünyasınıñ» propagandasını yapmaq içün vaqtınca işğal etilgen topraqlarğa gumanitar yardımnı balıp kete», – dep qayd etti faal.
Tamır halqnı çıqarıp, Rusiye Federatsiyasınıñ depressiv regionlarından kelgen ya da arbiylerni yerleştirmege tırışalarGülsum Tamaq
Qırımtatar faali Osman Osmanovnıñ fikirince, qırımtatarlar Aksenovnıñ kontroli altında olğan teşkilâtnıñ ğayelerini körmemezlikke ura.
«Qırımtatarlarnıñ ekseriyeti iç bir vaqıt bu şurağa qoltutmadı ve qoltutmay. Bütün ğayeleri halq tarafından körmemezlikke urula. Bu şura «qırımtatarlarnıñ qoltutuvını» köstermek içün dünya cemaatçılığınıñ aqlını qarıştırmaq maqsadınen quruldı», – dep tarif etti faal Qırım.Aqiqatqa.
Qırımtatar jurnalisti Osman Paşayev şura azalarını «Qırımda halqına qarşı repressiyalarda iştirak etken kiçik bir işbirlikçiler gruppası» dep adlandırdı.
Qırımtatar resurs merkeziniñ reberi Eskender Bariyevniñ qayd etkenine köre, «bugün işğal altındaki Qırımda aman-aman er bir qırımtatarı saba bam-başqa bir statusta uyana bile, yani – işğalciler tarafından «terrorist», «ekstremist», «diversant» dep adlandırılması mümkün.
Qırımtatar Milliy Meclisiniñ reisi Refat Çubarov Ukrayına Silâlı quvetleri Qırım yarımadasına yaqınlaşqanınen Rusiye uquq qoruyıcıları işğal etilgen Qırımda repressiya ve taqiplerni quvetleştirecek.
MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
