«Qırım birdemligi» cemaat birleşmesi, Qırımnıñ İçki rayonındaki İçki (Sovetskiy) ve Yanış Taqıl (Zavetnoye) köylerinde bir qaç qırımtatarı Rusiye akimiyeti kontrolindeki İslâm Terek rayonlarara tahqiqat bölügine «olarğa belli olmağan cinaiy dava boyunca» şaat olaraq kelmek talabınen celpnameler aldı, dep bildirdi.
«Eñ az üç kişi uquq qoruyıcılarnıñ ziyareti aqqında bildirdi, ekisi faal – Vait Zeynaliyev ve Nuri Bekirov. Celpname alğanlar tahqiqat komitetine haber mektübi yazmağa niyetlene, çünki celpnameler raatlıq künü, sorğudan üç saat ögüne berildi. Böylece, kimseniñ tahqiat tedbirinde iştirak etecek imayecini davet etmege ve qanunğa uyğun aqqını yerine ketirmege imkânı olmadı», – dep aytıla faallerniñ haberinde.
Qırımdaki Rusiye Tahqiqat komitetiniñ idaresi İçki rayonınıñ sakinlerine kelgen celpnamelerni açıq-açıq izaatlamay.
Cuma künü, mayısnıñ 21-nde, saat 11:00-da Rusiye quvetçileri İçki rayonınıñ sakini Muslim Zevriyevniñ evine «tahqiqat tedbirlerini» keçirmege keldi. Quvetçiler bir protokol qaldırmadı, daa bir kere kelecekler, dep aytmadı, dep bildirdi Zevriyev.
Quvetçi ve uquq qoruyıcı müessiseleriniñ bu tintüvnen bağlı izaatları yoq.
Mayısnıñ 19-nda «Qırım birdemligi» cemaat birleşmesiniñ mühbiri Zidan Acikelâmovğa bir qaç polis ve FSB hadimleri «protsessual tedbirlernen» keldi, dep haber etilgen edi.
Rusiye quvetçileri İçki rayonınıñ Yanış Taqıl köyünde tintüv keçirdi. Daa soñra Aqmescit civarındaki Dubki köyünde daa bir evde tintüv başlandı, anda Özbekistan vatandaşı Nabi (Ayub) Rahimov atıp öldürildi. Bundan soñ Qırım ve Aqyardaki Rusiye Tahqiqat komiteti idaresiniñ saytında «operativ vazifesini» yapqan FSB hadimlerine qarşı ateş açqan erkekke qarşı cinaiy dava açıldı, dep haber etildi. Adamnıñ adı ve soyadı aydınlatılmadı. Daa soñra FSB Qırımda «silâlı isyancı yoq etildi», dep bildirdi.
Rusiye kontrolindeki İçki rayon mahkemesi mayısnıñ 11-nde atıp öldürilgen adamnıñ ömür arqadaşı Sohiba Burhanovanı sürgün etüv qararını çıqardı. Onı çetel vatandaşı ya da vatandaşlıqsız şahıs tarafından Rusiyege kiriş qaidelerini ya da bulunuv rejimini bozğanında (Rusiye Memuriy bozuv kodeksiniñ 18.8 maddesiniñ 1.1 qısmı) qabaatladılar.
Qırım Muhtar Cumhuriyeti ve Aqyar prokuraturası, Özbekistan vatandaşı Ayub (Nabi) Rahimovnıñ Aqmescit civarındaki Dubki köyünde öldürilüviniñ tafsilâtlarını bilmek içün «kerekli tedbirler» alına, dep bildirdi.
