Ukrayına devlet bayraq kününde, avgustnıñ 23-nde, ağda sarı-mavı bayraqlı insannıñ fotoresimi peyda oldı. Aytılğanına köre, resim Qırımnıñ Cenübiy yalısındaki Şaan Qayada yapılğan.

Bundan evel Kefede ve Aqmescitte qora, skemle ve tereklerge baylanğan sarı ve mavı-sarı şeritlerniñ fotoresimleri derc etilgen edi.

Keçenleri ağda Bağçasaray civarındaki Rusiye arbiy tehnikası olğan yerniñ videosı peyda oldı. Bu aqta videonen beraber derc etilgenhaberde aytıldı.

Bu foto ve videonı «Sarı şerit» (ukr. «Jovta striçka» – QA) ve «Ateş» teşkilâtlarınıñ azaları yapqan, olar özüni Qırımda ve Rusiye işğal etken diger yerlerde Ukrayına tirenüvi dep adlandıra. Olar kim ve bunı ne içün yapalar, Qırım.Aqiqat bilmege tırıştı.

«Olarnen «işbirligi» yapamız» – Ukrayına Mudafaa nazirliginiñ Baş istihbarat idaresiniñ yolbaşçısı Kırılo Budanov Qırım.Aqiqatqa bergen intervyüsında jurnalist Anjelika Rudenkoğa bunı böyle añlattı.

«Peyda olğan bu areketler istegenimiz qadar küçlü degil. Amma bar olğanları pek yahşı – eñ esası olarnıñ olmasıdır… İnsanlar risk ala, añlaylar: ne yapalar, ne içün yapalar», – dedi Budanov.

Sarı-mavı işaret qaldırmaq

Sarı-mavı şeritler baylamaq, «Qırım – Ukrayınadır» yazuvlı şiarlarnı yapıştırmaq ya da divarda yapılğan «Z» işaretini sarı-mavı qum saatına çevirmek – «Sarı şerit» işğal etilgen Qırımda ve Rusiye işğal etken diger topraqlarda yapqan eñ meşur fleşmoblardandır.

Aleks (adı telükesizlik maqsadınen deñiştirildi – QA) – «Sarı şerit» teşkilâtınıñ koordinatorlarından biri Qırım.Aqiqatnen laf etip, Qırımdaki areket 10 insandan başladı, şimdi ise yarımadanıñ bütün büyük şeerlerinde yaşağan biñlernen insan bar, dep qayd etti. «18-de 60 yaşına qadar, 50+ insanlarımız çoq. Violetta Stolârova kibi, o, tutulğan edi, amma Ukrayına kontrol etken topraqqa çıqıp oldı. 58 yaşında ve biznen beraber edi… İnsanlar farqlı, amma fikirleri bir: Qırım – Ukrayınadır, Melitopol – Ukrayınadır, Donetsk – Ukrayınadır», – dep tarif ete Aleks.

Areket qayd etkenine köre, olarnıñ teşkilâtı zorbalıqsız tirenüv yapa. Anda böyle usul daa çoq semetdeşni celp eter ve daa telükesiz ola, dep tüşüne. Çünki Qırımdaki Rusiye akimiyeti olarnen küreşe, dep tarif ete Aleks Qırım.Aqiqatqa.

«Vaqtınca işğal etilgen topraqlarda Ukrayına timsallerini qapatqan ve üzgen gruppalar çalışa, faallerimizni tapmağa tırışalar… Amma böyle gruppalarda bizge malümat bergen insanlarımız bar: «Bugün anda barmañız deyler – meselâ, Aqmescitteki Lenin soqağında, çünki anda patrulnen yürecekmiz… Qırımda ve vaqtınca işğal etilgen Ukrayına topraqlarında bu yekâne telüke degildir… ve bu ciddiy mesele. Amma faallerimiz toqtamay, çünki azatlıq oğrunda küreşmemizge lâyıq», – dep ayta «Jovta striçka» koordinatorı.

Aleks tarif etkenine köre, olacaq aktsiyalar içün «Qırımda Ukrayına bayraqlarınıñ tikilüvi teşkil etildi ve bir çoq insan Ukrayına bayraqlarını azırlap saqlay».

Qırımda Rusiye arbiylerini taqip etüv

«Ateş» teşkilâtı bildirgenine köre, onıñ agentleri Aqyarda rusiyelilerniñ flotuna raketa darbesi içün yer kösterdi.

Sentâbrniñ 13-nde Ukrayına Mudafaa nazirligi Baş istihbarat idaresiniñ vekili Andriy Yusov «Babel» neşirine bergen izaatlarında gece Sevmorzavodqa qarşı yapılğan ücüm vaqtında eki Rusiye gemisi zarar kördi, dep tasdıqladı. «Rostov-na-Donu» dizel-elektrik deñizaltı qayığı ve «Minsk» büyük desant gemisi aqqında aytıla.

«Ateş» teşkilâtınıñ vekilleri Qırım.Aqiqatqa izaat berip, Rusiye gemilerine qarşı ücümge nasıl azırlağanlarını tarif etti.

«Belli bir vaqıt devamında Ukrayına Mudafaa quvetlerinen işbirligi yapıp, olarğa darbe içün nişan belgilemege yardım etemiz. Qırım ealisi keniş bir sürette qoltutqanı içün çeşit saalardan insanlarnı celp etip olamız. Bu sefer de öyle oldı. Bir afta insanlarımız rusiyelilerniñ deñiz gemilerini belgilep, faalligini taqip etken ve vazifelerini yerine ketirmek içün bağ qurğan. Qayd etilgeni kibi, em Rusiye Arbiy deñiz quvetleriniñ arbiyleri, em vatandaşlar bar – adiy aqyarlılar. Rusiyeniñ Qara deñiz flotunı diqqatnen közetemiz, amma yarımadadaki nişan tek o degil. Amma Ukrayınağa raatlıq bermegen bu qanatlı raketa taşıyıcıları yoq etilmeli edi ve bu yapıldı. Bu soñki operatsiya olmağanını tasdıqlay bilemiz. Rusiyeliler gemilerini ya Qırımdan çıqaracaq, ya da ola yoq etilecek. Özleri saylasın», – dep bildirdi teşkilât.

«Ateş» özüni Rusiye işğal etken Ukrayına topraqlarında ve Rusiyede areket etken «ukrayınalılar ve qırımtatarlarnıñ arbiy areketi» dep saya. Teşkilât 2022 senesi sentâbr ayında peyda oldı ve o vaqıttan berli aman-aman er kün yapqan faaliyetine dair esabatlarnı Telegram kanalında derc ete.

Meselâ, Aqmescitteki arbiy aerodrom yanında olğanları, Qırım şimalinde Rusiye Federatsiyasınıñ ordusını taqip etkenleri ya da Bağçasaray rayonındaki (Bazarçıq) Poçtovoye köyünde demiryolnıñ bir qısmını bozğanlarına dair foto paylaşa.

Qırım.Aqiqat muarririyeti bu malümatnı mustaqil menbalardan tasdıqlap ya da red etip olamay.

«Ateş» öz haberlerinde Rusiye ordusı bölükleriniñ foto, video ve koordinatları Telegram kanalında malümat «kerek olğan yerge berilgen» soñ peyda ola, dep qayd ete.

Rusiye akimiyeti Ukrayına tirenüvini köre

Ukrayına Silâlı quvetleriniñ mahsus operatsiyalar quvetleri tarafından qurulğan Milliy tirenüv merkezi Qırım.Aqiqatqa izaat berip, Rusiye akimiyetiniñ kelmesinen razı olmağanlarnıñ işini aman-aman 10 yıl devam etken qanunsız yarımada ilhaqı zorlaştıra, dep bildirdi.

«Olar repressiv maşinalarını çalıştırdı, memuriy-polis rejimini ve gizli areketimizge qarşı usullarnı quvetleştirdi. Qırımda celp etilgen uquq qoruyıcılarnıñ sayısı Zaporijjâ regionındaki uquq qoruyıcılardan çoq, meselâ. Şeerler aqqında aytıla», – dep bildirdi Ukrayına milliy tirenüv merkeziniñ spikeri, onıñ adı telükesizlik maqsadınen gizli qala.

Merkez tirenüvde iştirak etmege istegen insanlarnıñ sayısı arta, dep qayd ete.

«Misal olaraq, duşman Aqyarda ketip, anda sarı şerit, bir risale körse ve soñra Telegramda partizanlar sayesinde Carılğaçta arbiyler yoq etildi ya da «Rostov-na-Donu» suvaltı qayığına darbe endirildi, dep oqusa, ne olğanını añlay. Arbiy saa bar – semereli çalışqan mudafaa quvetleriniñ arbiyleri ve gizli areket – yardım etken yerli vatandaşlar... Olar kerçek bir ikâye olğanını añlaylar», – dep qayd etti Merkez.

Qırımnıñ Rusiyege qoltutuvı qabartılğan

Qırımnıñ bütünley Rusiyege qoltutqanı doğru degildir. Bu aqta Qırımnıñ ukrayınler ülke şurasınıñ vekili Serğiy Kovalskıy Qırım.Aqiqatqa bildirdi.

«Şübhesiz, propaganda öz işini yapa, amma (Qırım – QA) Rusiyege qoltuta ve onı Rusiyege qaldırmaq kerek dep aytmaq Qırım tarihını bilmemek ve bunı bir qırımlı aytmay», – dedi Kovalskıy.

Serğiy Kovalskıy – «Euromaydan-Krım» areketiniñ koordinatorlarından biri şimdi Qırımda tirenüv areketiniñ farqlı şekilleri bar, er vaqıt açıq olmay, dep ayta.

«Bu lafta saylavlar bile nasıl bir netice kösterdi? Keçken raatlıq künleri («bir rey berüv künü» aqqında aytıla – QA). İnsanlar passiv tirenüv sebebinden saylavlarğa barmay. Amma bilemiz, ocalar, devlette çalışqanlarğa toqtamayıp sms yollağanlar, kelip esabat bermege zorlay ediler. Bugünki tirenüv farqlı şekillerde keçe, çünki insanlar içün belli telükeler bar... Amma bunı aytayım. Bu darbeler tammı? Bu yanğın, patlavlar? Olar Qırım içün adiy bir şey oldı. Tam koordinatları bar, tehnika olğanını bilgen insanlar bar. Bu areketler içün qırımlılar tarafından yardım kösterile», – dedi Kovalskıy Qırım.Aqiqatqa.

MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.