Rusiye kontrolindeki Aqmescitniñ Kiyev rayon mahkemesi «Hizb ut-Tahrir davasınıñ» mabüsleri Lenur Seydametov ve Timur Yalkabovnıñ apiste qaluv müddetini sentâbrniñ 15-ne qadar uzattı.
Bu aqta «Qırım birdemligi» cemaat birleşmesi haber ete.
Advokat Refat Yunusnıñ fikirince, bu mahkeme qararı sebepsiz ola, çünki Rusiye tahqiqat organları böyle sıñırlav tedbiriniñ berilmesi içün kerekli malümat bermedi.
«Apiste tutuv kibi sıñırlav tedbiri ihtiyacı ve sebepleri ve mahkemege kösterilecek deliller tahqiqat organları tarafından, er vaqıt kibi, kösterilmedi. Biz imaye olaraq kerek olsa, başqa sıñırlav tedbiri saylana bile, dep kösterdik, amma bizni eşitmediler», – dedi Yunus.
Moskva kontrolindeki Lenin rayon mahkemesi Qırımdaki «Hizb ut-Tahrir davasınıñ» mabüsi Yaşar Şihametovnı apiste tutuv müddetini 2 ayğa uzatqan edi.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi. Tahqiqat tedbirleri keçirilgende tutulğan insanlarnıñ tuvğanlarına berilgen malümatqa köre, olar Rusiye Ceza kodeksiniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – muar.) qabaatlana.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
