Link açıqlığı

Saatnıñ esas haberi

Qırımdaki mahkeme «Hizb ut-Tahrir davası» mabüsiniñ apis müddetini eki ayğa uzattı – advokat


Aleksey Ladin
Aleksey Ladin

Moskva kontrolindeki Lenin rayon mahkemesi Qırımdaki «Hizb ut-Tahrir davasınıñ» mabüsi Yaşar Şihametovnı 2 ayğa apiste qaldırdı. Mahkeme oturışuvı qapalı oldı.

Bu aqta «Qırım birdemligi» cemaat birleşmesi Qırım.Aqiqatqa bildirdi.

Advokat Aleksey Ladinniñ birleşmege tarif etkenine köre, imaye bu esnasqa diñleyiciler kirsetilsin dep muracaat etken edi, lâkin mahkeme onı red etti. «Mahkeme oturışuvınıñ qapalı rejimde keçirilüvi sebepsiz ve qanunsız ola», – dep tüşüne advokat.

Yaşar Şihametov advokatqa sağlıq problemleri aqqında şikâyet etti – qan basımı arta ve yüregi ağıra.

«Adam yaş degil ve tahqiqat izolâtorınıñ işkence şaraitlerinde tutula, ne yazıq ki, bu endi adiy şey oldı. Ne de olsa, teslim olmay», – dep qayd etti Ladin.

Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi. Tahqiqat tedbirleri keçirilgende tutulğan insanlarnıñ tuvğanlarına berilgen malümatqa köre, olar Rusiye Ceza kodeksiniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – muar.) qabaatlana.

Qırımdaki «Hizb ut-Tahrir davaları»

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG