Ukrayına arbiyleri işğal altındaki Qırımda ve Rusiye zapt etken Ukrayına obyektlerinde operatsiyalar keçire. Şimdilik bu Ukrayına Silâlı quvetlerini meraqlandırğan yerlerde qayd oluv olaraq yapıla. Amma, arbiy ekspertlerniñ fikirince, neticeleri büyük. Qırım yarımadasında Ukrayına quvetleri qayda yetip oldı ve bu ne içün kerek, Qırım.Aqiqatnıñ maqalesinde tarif etile.

Rusiyeniñ Ukrayınağa qarşı büyük istilâsı başlağanınen Qırımnıñ Kyiv kontroli altına qaytması aqqında em Ukrayına haberlerinde, em halqara mediada daa sıq ve eminliknen aytıla.

Qırım bir yıldan berli cebege yaqın regin ola, uçucısızlar ve raketalar toqtamayıp kele. Ukrayına Silâlı quvetleri Qırım yarımadasında Rusiye arbiy bazalarına darbe endire. Amma avgust ayında vaziyet deñişti. Ukrayına quvetleri Qırımğa kele ve yalısında operatsiyalar keçire, Rusiyeniñ yarımada «irişilemegen bir qale» ola mifi yoq etile.

Qırımnıñ ğarbinde Ukrayına desantı

Avgustnıñ 24-nde Tarhan Qut burnundaki Mayak köyü civarlarında Ukrayına Silâlı quvetleriniñ desantı qondı, dep bildire Ukrayına istihbaratı. Anda yaldav vastaları ve aviatsiya iştirakinen uruş oldı, dep qayd ete müessise.

Mayakta Rusiye arbiyleri Rusiye Federatsiyasınıñ Ava-kosmik quvetleriniñ üçünci radiotehnik polkunıñ bazasını yerleştirdi.

Rusiye radiotehnik istihbarat vastaları Ğarbiy Qırımnıñ diger regionlarında da bar. Olar turistler tarafından pek az köründi.

Rusiye akimiyeti olıp keçkenlerni açıq şekilde bildirmedi. «SHOT» Rusiye Telegram kanalınıñ malümatına köre, Tarhan Qut burnu rayonında atış sesleri eşitildi ve «Qale» planı ilân etildi, arbiy telüke olğanda uquq qoruyıcılarnıñ areketini bu plan belgiley.

Ukrayına Mudafaa nazirligi Baş istihbarat idaresiniñ vekili Andriy Yusov «(desantnıñ Tarhan Qut burnunda qonması – QA) qoyulğan maqsadlarğa irişildi», «tedbirler ise devam ete», dep bildirji.

Avgustnıñ 25-nde Ukrayına Mudafaa nazirligi Baş istihbarat idaresi Ukrayına desantı Kezlev civarındaki Novoozernoye mesken yerinde tekrar qonğanını bildirdi.

Rusiye ordusı Qırımnıñ ğarbiy yalısını bir qaç ay devamında arbiy inşaatlarnen pekitken olsa da, bu operatsiyalarnı keçirmege imkân oldı.

Ğarbiy Qırımda Ukrayına desantından qorqıp okoplar qazğanlar ve «ajderha tişlerini» qoyğanlar, bir çoq regionda kurort mevsimine imkân bermegenler.

«Boyko qulleleriniñ» qaytuvı

Sentâbr ayında Ukrayına Mudafaa nazirliginiñ Baş istihbarat idaresi Qara deñizde «Çernomorneftegaz» cermay gaz çıqarğan platformaları olğan dört «Boyko qullesi» Ukrayına kontroline qaytarıldı, dep bildirdi.

Ukrayına mahsus bölügi Qara deñizde gemilerniñ areketini taqip etken «Neva» radiolokatsion stantsiyasını ve idare etilmegen aviatsiya raketalarınıñ vertolöt silâ yedeklerini zapt etip oldı.

Ukrayına Mudafaa nazirliginiñ Baş istihbarat idaresi Qara deñizde keçirgen operatsiyalarınıñ videosını kösterdi – istihbaratçılarnıñ rezina qayıqlarınen keçken yolunı, Rusiye istihbaratınıñ obyektleri ve vastalarını faydasız alğa ketirgenini, Rusiye aviatsiyasınen çatışqanını ve safdaşınıñ tahliyesini.

Rusiye akimiyeti ve arbiyleri bu aqta bildirmey ve Ukrayına istihbaratınıñ malümatını izaatlamay.

Ukrayına Silâlı quvetleriniñ Arbiy deñiz quvetleriniñ spikeri Dmıtro Pletençuknıñ aytqanına köre, Ukrayına Silâlı quvetleriniñ Arbiy deñiz quvetleri yalı raketa top ordusı bir yıldan berli «Boyko qulleleri» yerleşken Qara deñizniñ qısmını bütünley kontrol ete, Rusiye arbiy gemileri ise olarnıñ «Vasiliy Beh» gemisi ücümge oğrağan soñ anda kirmey.

«Strategiya XXI» Globalistika merkeziniñ prezidenti Mıhaylo Ğonçar bildirgenine köre, qullelerniñ Ukrayına kontroli altına qaytması Qara deñizniñ şimal-ğarp sektorından «Rusiyeniñ qulaq ve közlerini» çetleştirmege imkân berdi.

«Ukrayına içün büyük bir ğalebe. Çünki 2017 senesinden berli Rusiye «Boyko qullelerini» arbiy nişan olaraq qullanğan edi. Anda «Neva» radiolokatsion stantsiyasını qoyıp, Rusiye Qırım ve Odesa vilâyeti arasındaki sektorda deñiz ve ava boşluğını kontrol altına aldı. 2022 senesi anda radioelektron küreş donatmaları, flot içün bağ retranslâtorları qoşuldı ve teşüv tertibatlarında Ukrayına yalısında areket etken Rusiye diversion-istihbarat gruppaları içün silâ saqlandı. Kerekmegen «köz» ve «qulaqlarnıñ» yoq etilüvi Rusiyeniñ istihbarat imkânlarını eksilte. Qırımda Rusiye gruppirovkası artıq bir şey körmey, eşitmey demek degil. Amma künde 24 saat, aftada yedi kün toqtamağan monitoring yoq», – dep añlattı Qırım.Aqiqatqa Mıhaylo Ğonçar.

Ekspert Rusiye «Boyko qullelerini» kontrol altına alıp, anda istihbarat donatmalarını qoymağa tırışa bile, dep ayta. Amma «çoq sürmez», çünki Ukrayına Silâlı quvetleri onı köre, dep qayd ete Mıhaylo Ğonçar.

Partizan aktsiyaları

Rusiyeniñ Ukrayınağa qarşı büyük istilâsı başlağanınen Qırımda Rusiye istilâsına qarşı tirenüv areketleri – «Jovta striçka» (ukr. «Sarı şerit» – QA) ve «Ateş» – peyda oldı. Olar Qırımda demiryolnı patlata, Z timsallerini yoq ete ve yarımadada Ukrayınağa qoltutuv risalelerini tarqata, dep bildireler.

Areket iştirakçileri partizan fleşmobını da uydurdı, onıñ çerçivesinde M14 yolunda Rusiye işğal etken Ukrayınanıñ Azaq deñizi yalısından Qırımğa ketken rusiyeliler içün şpora, cam, mıh ve tökülgen yağ şeklinde «ediyeler qaldırmağa» çağıra.

«Olarnen «işbirligi» yapamız», dep ayttı Qırım.Aqiqtqa Ukrayına Mudafaa nazirligi Baş istihbarat idaresiniñ yolbaşçısı Kırılo Budanov Qırım yarımadasında partizan areketi aqqında aytıp.

«Peyda olğan bu areketler istegenimiz qadar küçlü degil. Amma bar olğanları pek yahşı – eñ esası olarnıñ olmasıdır… İnsanlar risk ala, añlaylar: ne yapalar, ne içün yapalar», – dedi Budanov.

«Qırımnıñ işğalden qurtarıluvına azırlıq»

Qırımda Ukrayına Silâlı quvetleri tarafından yapılğan bütün tedbirler Ukrayınanıñ deñiz strategiyası ceetinden baqılmalı, dep ayta Arbiy-uquqiy tedqiqatlar merkeziniñ (Ukrayına) reberi Oleksandr Musiyenko.

«Bu strategiyağa köre, irişilmesi kerek olğan eki esas maqsat bar: Qara deñizniñ şimaliy-ğarbiy taraflarında Ukrayına quvetleri pekitilmeli ve Rusiye ordusınıñ işğal etilgen Qırımdan silâ ve snarâdlarnı aluv imkânları eksilmeli. Bu eki maqsat çerçivesinde çeşit operatsiyalar ve mahsus tedbirler keçirile», – dedi o, Qırım.Aqiqatqa.

Bu operatsiyalarnıñ strategik faydası ileride körünecek, dep tüşüne ekspert.

«Ukrayına quvetleriniñ Qırımğa kirip çıqqanından faydası yoq, dep tüşüne bileler. Amma böyle degil. Çünki Ukrayına arbiyleri Qırım yalısında qonmaqtan ğayrı başqa vazifelerini yerine ketirdimi bilmeymiz. İstihbaratnen bağlı bir sıra şey ola bile, diversion-istihbarat gruppaları kirip, Qırımda qala, malümat bere, ateşni doğrulta, diger operatsiyalar içün imkânlar azırlay bile», – dep tüşüne Oleksandr Musiyenko.

Onıñ fikirince, bu tedbirlerni Qırım yarımadasını «işğalden qurtaruv azırlığı» olaraq körmek mümkün.

Ukrayına akimiyeti Qırımnı işğalden azat etmek niyeti aqqında bildire.

Rusiye akimiyeti Qırımnı «Rusiyeniñ ayırılmaz parçası» olaraq saya ve «er angi iddia» içün «kerekli cevap bermege» vade ete.

Kreml kontrolindeki Qırım yolbaşçısı Sergey Aksenov yarımadada mudafaa ve fortifikatsiya şekillendirildi, şunıñ içün Ukrayına onı işğalden qurtarıp olamaz, dep bildire.

MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.