Rusiye Federatsiyası işğal etken Qırımda yalı kenarındaki kurort alanınıñ quruluvı yañı büyük leyhaları aqqında haber etmege devam eteler. Qırımnıñ Rusiye akimiyeti ve yatırımcılar ne içün kütleviy quruvnen oğraşa, Qırım.Aqiqatnıñ maqalesinde oquñız.
Keçirilecek 2024 senesi Peterburg halqara iqtisadiyat forumında ilhaq etilgen Qırım vekilleri 39,5 mlrd rubleden çoq añlaşmalar tizmege planlaştıra.
«Peterburg halqara iqtisadiyat forumında Qırım adet üzre eñ perspektiv yatırım leyhalarını taqdim ete. Bu yıl aralarında Keriç, Bağçasaray rayonı ve Qırım yarımadasınıñ ğarbinde topraqlarnıñ umumiy inkişafı, kurort ve mesken quruvı leyhalarını qayd etmek mümkün. Eminim, forum neticelerine köre tizilgen añlaşmalarnıñ cemisi daa çoq olacaq», – dep bildirdi Qırımnıñ Rusiye yolbaşçısı Sergey Aksenov.
Qırımnıñ içtimaiy ağlarında laf çoq daireli inşaatlar aqqında kete, dep qayd etildi.
Qırımnıñ Rusiye akimiyeti 2030 senesine qadar 22 biñ yañı musafirhane odası peyda olacaq, dep vade ete. Kezlev rayonında «Rusiyeniñ altın qumları» leyhası çerçivesinde 20 kilometrden uzun yalı kenarını abadanlaştırmağa planlaştıralar.
Qırımda menfaatları olğan ekspertlerniñ fikrinen mal-mulk satın almağa celp eteler.
«Qırımda ava limanını açmaq planları aqqında malümat peyda olğanınen mulkniñ metr kâresi er kün paalılaşacaq, topraq ve dairelerniñ fiyatı 3-5 qat artacaq», – dep ayttı Golden Brown mulk satuvı halqara şirket gruppalarınıñ satış bölüginiñ reberi Polina Vasilyeva «Sputnik v Krımu» radiosınıñ yayınında.
Yatırım añlaşmaları qurucılıq leyhalarınıñ ilk tabiat qorçalayıcı ekspertizaları yapılmayıp tizile. Bu aqta yerli faal gizli qalmaq şartınen Qırım.Aqiqatqa tarif etti. O, Qırımnıñ Rusiye ükümetiniñ Tabiat nazirliginiñ cevabına esaslana. Vesiqada qayd etilgenine köre, obyektlerniñ quruluvı tasdıqlanğan şeer quruv vesiqalarına uyğun bir şekilde ve leyha vesiqalarına esaslanıp yapıla. Tabiat qorçalayıcı qısmı mıtlaqa bar, planlaştırılğan hocalıq ve diger faaliyetniñ, yerine ketirilüviniñ tabiatqa olacaq tesiri ve büyükligi, bu tesirniñ ekologik, içtimaiy-iqtisadiy ve diger aqibetlerine qıymet kesüv, bu tesirni eksiltüv imkânları olmalı.
«Rusiyeniñ altın qumları» ve «Qırım Rivyerası» yıllıq kurortlarınıñ inkişafı çerçivesinde obyektlerniñ quruluv uyğunlığı, tabiat qorçalav saasındaki leyha vesiqaları talaplarına uyğun olması, obyektlerniñ leyha vesiqalarınıñ ekpertiza neticelerine köre belgilenecek», – dep qoştı faal, Rusiye memurlarınıñ cevabına esaslanıp.
Turizm saasında ekspert olğan Serğiy Vikarçuknıñ Qırım.Aqiqatqa bildirgenine köre, qayd etilgen leyhalar yarımada içün yañı bir şey degil.
«Leyhalar büyük, amma Qırım içün sürpriz degil. Böyle leyhalar Qırımda on yıllar devamında muzakere etile. Men Qırımnıñ turizm saasında çalışqanda böyle bir leyhamız bar edi, bugün Aksenov eski leyhalarnı alıp, özüne ait bir şey kibi tanıta. Amma olarnıñ meselesi Qırımnıñ inkişafı degil, bücet parasını «aluv». Eminim, bunı yaparlar. Leyhalarnıñ yerine ketirilüvini közetmek ve Qırım yarımadası işğalden azat etilgen soñ quvanmaq ya da ağlamaq qala», – dep izaatladı vaziyetni ekspert.
Muarriyet telükesizlik maqsadınen soyadını aytmağan qırımlı faalniñ fikirince, büyük biznes Qırımda inşaatnen oğraşıp, yatırım şaraitlerinde kâr qazanmağa tırışa.
«Musafirhane ve diger infrastrukturanı qurğan iş adamları Qırımda yatırımcılarnıñ saylavına baqıp büyük para qazanmağa istey. Ebet, bu kurortlar er keske açıq olmaycaq, tek Rusiye Federatsiyasınıñ çeşit regionlarından zengin adamlar içün olacaq. Adiy qırımlılar içün ise daa az yer qalacaq, sovetlerden qalğan ve «bizge kerek olmağan seniñ olsun» printsipine köre. Qırım büceti bu ğayeden bir şeyler qazanırmı aytmağa daa erte, lâkin devam etken arbiy areketler vaziyetinde bu ğaye veba vaqtında ziyafetni añdıra», – dep ayttı fikrini Qırım.Aqiqatqa faal.
Muarriyet telükesizlik maqsadınen soyadını aytmağan qırımlı faal emin ki, Qırımğa o qadar yañı musafirhane kerekmey.
«İş yerleri – yahşı bir şey (Qırımda turizmniñ inkişafı kibi), amma bu yañı otellerde kim raatlanacaq eken? Sanki şimdi yer yetmey... Bilgenime köre, şimdiki yerleşüv müessiseleri er bir turist içün küreşe ve yüksek mevsimde bile er kes yüz fayız tolu olğanınen maqtanıp olamay. O qadar yañı obyekt nege kerek? Kimler içün?», – dep ayttı fikrini Qırım.Aqiqatqa faal.
Qırım işğalinden soñ yarımadağa köçken rusiyeli bloger Aleksandr Gornıy böyle kütleviy quruv olsa, Qırım kurort olaraq celp etmeycek, dep yaza.
«Qırım inkişafınıñ perspektivaları ve bu inkişafnıñ aqibetlerini añlamaq içün maña zaman maşinası kerekmey. Bir metr kârede olğan dolandırıcılarnıñ sayısı Rusiyeden ögde kete. Yatırımcılar çoqusı allarda bücet parasına ve imtiyazlı kreditnen toqtamayıp areket ete ve bu yerlilerniñ añlaşmalarıdır», – dep ayta bloger.
Qırımlı faallerniñ malümatına köre, Qırımda baar kurort mevsimi (Yaltadan ğayrı) yaramay oldı. Ekspertler Qırımnıñ turizm saasında biznes ket-kete «kölgege keçe», dep qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
