AQMESCİT – Aman-aman er kün Ukrayınağa kösterilgen arbiy yardım aqqında haberler kele. Ukrayına Silâlı quvetleri küç toplap, Qırımğa qarşı ücümge azırlana. Qırım uruşı XXI asırnıñ eñ qanlı cenkiniñ soñunı belgileycek, dep tüşüne ABD Avropadaki sabıq ordu komandaı Ben Hodges.
Ukrayına Silâlı quvetleriniñ baş komandanı Valeriy Zalujnıy büyük muvafaqiyetli qarşı ücümlerni azırlamağa ve kerçekleştirmege (Harkiv vilâyeti ve Herson azat etilüvi) bilgenini endi eki kere isbatladı, şimdi aşıqmay. O, bölükleri vazifeni eñ semereli şekilde ve minimal ğayıplarnen yerine ketire bileceginden emin olıp, emir etecek.
Amma, ebet, tek Zalujnıy büyük uruşqa azırlanmay. Rusiyeden farqlı olğan Ukrayınada bütün eali, bütün elitalar, bütün cemaat birleşmeleri – er kes ordusına bu azırlıqta yardım ete.
«Ukrayınanıñ arbiy-siyasiy reberligi Ücüm seymenlerini şekillendirmek içün tedbir ala – Milliy gvardiya, Milliy polis ve Devlet sınhır hızmeti erkânında ücüm bölükleri, olarnıñ vazifesi işğal etilgen topraqlarnı azat etmek içün ücüm areketleri ola», – dep bildirdi Qırımtatar Milliy Meclisiniñ reisi Refat Çubarov. O, Ücüm seymenleri erkânında «Qaradağ» bölügi quruldı, anda qırımlılar davet etile.
Qırımlılar Ukrayına Silâlı quvetlerine faal sürette yardım ete, hususan Telegram kanalları vastasınen bir sıra bağ kanalı bar, anda Qırımdaki arbiy obyektler aqqında malümat berile.
Qırım paytahtınıñ Rusiye memuriyetiniñ saytında sığınaq obyektleri aqqında malümat yerleştirildi. Şeerde olarnıñ sayısı 450, Aqmescitniñ ealisi ise yarım milliondan çoq! Ne içün? Çünki yañı qurulğan binalarda kimse sığınaq qurmadı.
Qırımda artıq kimse külmey, amma aqaylıq daa qaldı
Qırımda artıq kimse külmey, amma aqaylıq daa qaldı. «Zelenskıy Ukrayına Silâlı quvetleriniñ «Azaq» qarşı ücüm ve «işğalden qurtaruvnen» daa bir kere qorquzdı», dep bildirdi kütleviy haber vastaları.
«Bekley. Qarşılar. Defin etermiz», – dep yazdı «VKontakte» saifesinde Qırımnıñ Rusiye yolbaşçısı Sergey Aksenov. Amma bazı oquyıcıları izaatlar qaldırıp, Herson soqaqlarındaki «Rusiye mından ketmeycek» yazuvlı bilbordları aqqında hatırlattı.
Bazı izaatlarda «Taygan» arslanlar parkında Ukrayınanıñ qarşı ücüm reberleri içün qafesler tapılır dep qorquzuvlar yazıldı, amma, mence, Qırım işğalden azat etilgen soñ «Taygannıñ» saibi Hersondan qanunsız çıqarğan yanatlardan boş qalğan qafeslerden birine oğray bile. «Rusiyege qoltutqan qırımlı iş adamı Oleg Zubkov rusiyelilerge Qırımnı işğal etmege yardım etti – bunı gizlemegen edi. Büyük istilâdan soñ işğal etilgen Ukrayına şeerlerinden ayvanlarnı hırsızlap çıqara… Ve hırsızlanğan Herson yanatınıñ fotoresimini neonatsist rus ordusınıñ şiarı altında qullanmaq – tsinizminiñ üst derecesidir», – dep qayd etti ukrayınalı jurnalist Andriy Ğevko.
Aksenov ise Qırım mudafaasına ciddiy seviyede azırlanğanına oşay. Qırımlı faallerniñ malümatına köre, Qırımda resmiy olmasa da, territorial mudafaa qurula, ve Rusiye akimiyetiniñ ilk sımaları bu esnasta faal iştirak ete. Ve bu Aksenovnıñ qanatı altında olğan «Tavrida» ücüm batalyonı, ÇVK «Konvoy», «aksenovcılarnıñ dobrobatı» ve «qırımlı opolçenlerden» ğayrı.
İşğal altındaki yarımadanıñ şimal çevresinde istihkamlar donatılğanı aqqında çoq yazıldı. «Qırım ğayesi» birleşmesi Qırımnıñ Yedi Quyu rayonında fortifikatsiyalar qurula, dep haber ete.
«Qırımnıñ Yedi Quyu rayonında çoq balalı ve tar kelirli qorantalardan qırımlı balalar içün bir qaç yaz lageri arbiylerniñ ihtiyaclarına berildi. Bu aqta «Qırım ğayesine» yerli sakinler bildirdi. Olarnıñ malümatına köre, arbiylerge sağlıq müessiseleriniñ reberleri yardım etti. Bu regionda qırımlı balalar içün yaz raatlığını teşkil etmek imkânlarından şübhelenüvni plâjda qısmen qurulğan beton, tranşeya ve qurşunatqıç noqtaları doğura», – dep bildirildi «Qırım ğayesiniñ» relizinde.
Qırımlılar kün-künden müit ne qadar kergin, furtuna evelsi kibi olğanını is ete. Furtuna bu mıtlaqa kelecek
Uçucısızlarnıñ Aqyarğa darbe endirmesi yerli «koloboknı» (şeerliler Kreml tayin etken Mihail Razvojayevge böyle ayta) da uyandırdı, o, Aksenov kibi uzun vaqıt «mahsus arbiy operatsiya» (Rusiye Ukrayınağa qarşı tam cenkni böyle adlandıra – QA) meselesinde pek faal degil edi. Niayet, Kremlniñ başlatqan cenki Qırımğa qaytqanını, Aqyar ise esas maqsadı olacağını añladı.
Qırımlılar kün-künden müit ne qadar kergin, furtuna evelsi kibi olğanını is ete. Furtuna bu mıtlaqa kelecek, işğalci ve işbirlikçiler ceza alacaq, çünki Kyiv eyi niyetli olıp, olarnı toqtamayıp tenbiley – keç olmağanda Qırımdan qaçıñız.
MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Zarema Seitablayeva, qırımlı, bloger (müellifniñ adı ve soyadı telükesizlik maqsadınen deñiştirildi)
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün