Bazarertesi, iyülniñ 17-nde, saba Keriç (Qırım) köpründe «fevqulâde bir adise» aqqında haber etildi – patlavlar neticesinde yol zarar kördi. Qırım.Aqiqat olğanlar aqqında yañı malümat derc ete.
İyülniñ 17-nde saba Qırımnıñ Rusiye yolbaşçısı Sergey Aksenov Keriç (Qırım) köpründe areket toqtatıldı, dep bildirdi. Onıñ aytqanına köre, Rusiyeniñ Krasnodar ülkesi tarafından 145-inci dayaqta fevqulâde adise oldı.
«Qırım köpründe areket toqtatıldı: Krasnodar ülkesi tarafından 145-inci tayanç rayonında fevqulâde adise oldı. Uquq qoruyıcı organlar ve bütün hızmetler çalışa», – dep yazdı memur Telegram kanalında.
Rusiye Naqliyat nazirligi köpür yolu zarar kördi, dep bildirdi. Telegram kanalları patlavlar aqqında yazıp, zarar körgen arabanıñ fotoresimlerini paylaşa. Rusiye tarafdarı bloger Aleksandr Talipov eki patlav aqqında yazdı – 3:04-te ve 3:20-de.
Rusiyeniñ Krasnodar ülkesi tarafından köpür kirişinde çoq kilometrli tıqanıqlıq peyda oldı, dep yaza RİA Novosti. TASS malümatına köre, tren areketi de toqtatıldı. Bundan ğayrı, parom seferleri toqtatıldı.
Belgorod vilâyetiniñ valisi Vâçeslav Gladkov bir qoranta çifti elâk oldı, dep bildirdi. Arabada 14 yaşında qızları da bar edi.
Şimdi köpür areketi toqtatıldı, Rusiye akimiyeti trenler saba saat 9-da areket etecek, dep vade etti.
Muarririyet bu malümatnı tez teşkerip olamay.
Ukrayına Mudafaa nazirliginiñ Baş istihbarat idaresiniñ spikeri Andriy Yusov Qırımnıñ Rusiye akimiyetiniñ Keriç köpründeki «fevqulâde adise» malümatını izaatladı.
«Bütün dünya çoq kilometrli tıqanıqlıqlarnı ve köpür bozuvlarını köre. Bunıñ sebeplerinen bağlı izaatlarnı biz izaatlamaymız. Tek Ukrayına Mudafaa nazirligi Baş istihbarat idaresiniñ reberi Kırılo Budanovnıñ «Qırım köprü – artqaç bir inşaat» degen laflarını tekrarlamaq mümkün», – dep ayttı o, «Suspilne» izaatlarında.
Onıñ qayd etkenine köre, köpürniñ bir sektsiyası zarar körgeni içün logistik problemleri peyda ola bile.
«Yarımada rusiyeliler tarafından Ukrayınanıñ içine quvet ve vastalarnı taşımaq içün büyük logistik hab olaraq qullanıla. Ebet, er angi logistik problemler işğalciler içün daa bir qıyınlıq», – dedi Yusov.
Kütleviy haber vastaları yañı malümatnı derc etti.
Qırım köpründe olğan zararlar – Ukrayına Silâlı quvetleri ve Telükesizlik hızmetiniñ Arbiy-deñiz quvetleriniñ mahsus operatsiyasıdır, dep bildire RBK-Ukrayına menbalarına esaslanıp.
«Köpürge suv üstü dronlarnen ücüm etildi. Köpürge yetmek zor edi, amma neticede oldı», – dep aytıla haberde.
Keriç (Qırım) köprüne zarar ketirilüvi Rusiyeniñ stsenariyi ola bile. Bunı «zahire añlaşması» uzatılacaqta ve Ukrayınanıñ qarşı ücümini beklep yapqanlar. Bu aqta Ukrayına Silâlı quvetleri Cenüp mudafaa quvetleriniñ matbuat hızmetiniñ reberi Natalâ Ğumenük bildirdi.
«Rusiyeliler Qırım köprü etrafında yapqan telükesizlik tedbirlerinden añlaymız ki, bu vaziyetni kontrol etkenler ve er şey olarnıñ stsenariyine köre ketti. «Zahire añlaşması» ne olacaq suali bugün berilgeni içün duşman bütün provokatsiyalarını qullana bile, dep tüşünemiz», – dep qayd etti o, «Suspilne» yayınında.
Ğumenükniñ aytqanına köre, Qırımnıñ Rusiye akimiyetiniñ ealige Ukrayınanıñ Zaporijjâ ve Donetsk vilâyetlerinde işğal etilgen yerlerinden keçip ketmek tevsiyeleri «bu regionlarnı vatandaşlarnen toldurıp, Mudafaa quvetlerini cenk çerçivesinde yañlış areket etkeninde qabaatlamaq içün» berile bile.
2023 senesi iyülniñ 17-nde Rusiye, Ukrayına, Türkiye ve BM arasında Ukrayına zahiresiniñ Qara deñiz limanlarından çıqaruv añlaşması olğan «zahir añlaşmasınıñ» (Qara deñiz zahire teşebbüsi) müddeti bite. Onı aman-aman bir yıl evelsi, 2022 senesi iyülniñ 22-nde, o vaqıt endi bir qaç ay devam etken Rusiyeniñ Ukrayınağa qarşı büyük silâlı istilâsı bütün dünyada aşlıq fiyatlarını arttırğan soñ imzalağan ediler.
Telegram kanalları zarar körgen Qırım köprüniñ videosını derc etti.
Körüngeni kibi, köpürniñ bir kemeri dayağından taydı, daa bir danesi ise zarar kördi.
Qırımğa ve Qırımdan ketken sekiz tren Qırım (Keriç) köpründe olğan zararlar sebebinden keç qala, dep haber ete TASS Rusiye agentligi.
Moskva, Volgograd, Rostov-na-Donu ve Sankt-Peterburgdan üç tren keç qala. Aqyar-Moskva treni de keç qala.
Aynı vaqıtta, berilgen malümatqa köre, Qırım köprü ögünde beş saat turğan Aqmescit-Moskva treni Qırımdan Krasnodar ülkesine keçti.
Eñ yaqın vaqıtta yengil maşinalarnı Keriç köpründen paromnen keçirmege planlaştıralar, dep yaza TASS.
Avtobus yolcularını Keriç köpründen elektriçkalarnen alıp ketecekler, dep bildire Qırımnıñ Rusiye yolbaşçısınıñ mesleatçısı Oleg Krüçkov.
Rusiye Federatsiyasınıñ Terror ile küreş milliy komiteti Qırım köpründe terror ücümi yapıldı, dep bildirdi. Ücümni kerçekleştirmek içün eki suvustü cihaz qullanılğan eken. Bu aqta «İnterfaks» haber ete.
«Saat 3:05-te eki Ukrayına suvustü cihazı Qırım köprüne ücüm etti. Terror ücümi neticesinde Qırım köprüniñ araba qısmı zarar kördi», – dep aytıla haberde.
Rusiye Federatsiyasınıñ Tahqiqat komiteti «Terakt» maddesine istinaden cinaiy dava açtı. «Maşina qısmı zarar kördi», – dep bildirdi müessiseniñ matbuat hızmeti.
Ukrayına akimiyeti köpürge ketirilgen zararğa alâqası bar olğanını resmiy şekilde tasdıqlamadı.
Aqmescitniñ merkeziy avtovokzal idaresi Qırım köpründen keçken Yalta-Brânsk, Aqyar-Moskva ve diger sefer yolcularından biletlerini kassağa teslim etip, parasını keri almalarını rica ete. Bu aqta Qırım.Aqiqat mühbiri bildire.
Aynı vaqıtta kassa hadimi Keriçke ketken «aman-aman bütün» seferlerniñ biletleri satıldı, dep ayttı. Yerli taksiciler hızmetlerini teklif ete.
Yolcular Keriç köpründen nasıl keçecek avtobus kassaları aytmay. Aynı vaqıtta, Qırım.Aqiqat mühbiriniñ malümatına köre, Aqmescit avtovokzalında Qırım köprüniñ zarar körmesinen bağlı büyük ajiotaj qayd etilmey.
Ukrayına prezidenti ofisiniñ mesleatçısı Mıhaylo Podolâk Qırım köpründe peyda olğan zararlarnı izaatladı.
«Rusiyeniñ kütleviy öldürüv aletlerini taşımaq içün qullanılğan qanunsız inşaatlar çoq dayanamay. Zarar körmesiniñ sebeplerine baqmadan», – dep yazdı o, Twitterde.
Rusiye akimiyeti Keriçte regional seviyede fevqulâde vaziyet rejimini ilân etti, dep bildirdi Rusiye Federatsiyası qurğan Qırım Fevqulâde vaziyetler nazirliginiñ yolbaşçısı Sergey Sadakliyev.
Keriçte operativ ştab işi de teşkil etilecek. «Keriç, Kefe, Canköy şeerleri, Yedi Quyu ve Qarasuvbazar rayonlarınıñ yolbaşçılarına Qırım köpründe areket sıñırlı qalacaq vaqıtqa avtobuslar turacaq yerler, başqa yerlerden kelgen vatandaşlar içün qızdıruv ve aşatuv noqtaları içün yer ayırmağa emir berildi», – dedi Sadakliyev.
MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
