Ukrayına Silâlı quvetleri işğal etilgen Ukrayına topraqlarında Rusiye ordusını teminlev yollarına darbe endirdi. Qırımnıñ Rusiye yolbaşçısı Sergey Aksenov Çonğar köprüne darbe endirdi, dep bildirdi. Özüni işğal etilgen Herson vilâyetiniñ valisi dep adlandırğan Vladimir Saldo işğal etilgen Qırım ve esas Ukrayınanı birleştirgen bir qaç köpürge yapılğan darbeler aqqında bildirdi. Bu köpürlerniñ zarar körmesi Ukrayına Silâlı quvetlerine ne bere? Keriç (Qırım) köprü nevbetteki ola bilemi? Bu aqta Vladislav Seleznev, Ukrayına Silâlı quvetleriniñ polkovniki ve arbiy ekspert Nastoyaşçeye Vremâ telekanalına (Amerikanıñ Sesi iştirakinen RFE/RL şirketi tarafından quruldı) ayttı.
– Qırımnı esas Ukrayınanen bağlağan bu yollardan başlayıq. Bu köpürlerge qarşı darbeler Ukrayına ordusına ne bere?
– Birinciden, rusiyelilerni böyle bir vaziyetke oğratmağa imkân bere ki, olar vaqtınca işğal etilgen Qırımdan Zaporijjâ vilâyetiniñ cenübine arbiy yüklerni taşımaq içün eñ az üç saat ziyade sarf etmege mecburlar. Çünki Canköyden Melitopolge qadar doğru ketseñ, 80 kilometr ola. Amma imkân olmağanı içün bozulğan köpürlerden degil, dolaşıp ketsek, Ermeni Bazar, Kalançak ve diger yerlerden, Herson vilâyetiniñ cenübi yollarından, bu mesafe tahminen 230 kilometr ola. Herson vilâyetiniñ cenübinde yollarnıñ vaziyeti pek yaramay olğanı içün tehnika uzun-uzun areket etecek. Demek ki, Rusiye ordusı Ukrayınanıñ qarşı ücümi çerçivesinde qarşılaşacaq bütün manialarnı tez yeñip olamaycaq.
– Amma tek üç saatqa arta, yani vaziyetni pek deñiştirmey?
– Yoq. Mesele şu ki, mında ve acele bir şekilde çoq silâ ketirmege kerek olsa, er bir saat pek müim. Em de yaqında Canköy ve Melitopol arasındaki demiryol stantsiyasında patlav oldı. Rusiyeliler şimdi demiryolnı qullanıp olğanından emin degilim. Ebet, bu demiryol stantsiyasını tamir eterler, amma, meselâ, yarın Sivaş stantsiyasına daa bir Storm Shadow kelmeycek ya da Çonğar rayonında köpür keçitlerine raketa darbeleri endirilmeycek demek degil.
– Jurnalist Roman Şrayknıñ fikrini oqudım. O, erte ya da keç Qırım köprüniñ sırası kelir, dep yaza. Razısıñızmı?
– Şübhesiz. Amerika generalı Ben Hodgesten soraylar: «Az qan tökip, Qırımnı Rusiye işğalcilerinden nasıl azat etmek mümkün?». O, birinci yapılacaq şey – Qırım köprüni yoq etmek ve Rusiye işğalcilerini Qırımda stabil logistik malzemelerinden marum etmek, dep cevap bergen edi.
– Bunı şimdi yapmaq mümkün degilmi ya da ne içün yapmaylar?
– Ukrayına baş ştabı mümkün olğanı qadar ratsional bir şekilde areket ete ve peyda olğan meselelerni çeze. Şimdi Herson vilâyetiniñ cenübi ve Zaporijjâ vilâyetiniñ cenübini işğalden azat etüv tedbirlerini keçirmege kerek olsa, Ukrayına baş ştabınıñ bütün ğayretleri bu yönelişte yapıla. Qırım köprüniñ de vaqtı kelecek.
– Şimdi Qırım köprüni yoq etecek silâ Ukrayınada barmı?
– Storm Shadow, Taurus – 500 kilometrge qadar mesafe keçe bilgen ve tahminen 450 kilogramm patlayıcı madde taşığan raketalar. Qırım köprüne bayağı zarar ketirmek içün bular yeterli olacaqtır. Bir dane yerine on dane uçsa, bu operatsiya yüz fayız muvafaqiyetli olacaq.
– Ukrayına ordusınıñ ücümi şimdi ne alda?
– Al-azırda Zaporijjâ vilâyetiniñ cenübinde olğan esnaslarnı büyük ücüm dep saymaq kerekmi? Men kerekmey, dep tüşünem. Uruşlar kete, Rusiye arbiy imkânlarını yoq etken, eksiltken, yorultqan esnaslar kete. Çünki uzun mesafeli top sistemalarınıñ muntazam işi sayesinde Ukrayına ordusı uruş meydanında üstün çıqa. Storm Shadow uzun mesafeli raketalarınıñ yardımınen duşmannıñ silâ anbarlarını külge çevirip olamız, bazı anbarlar pek uzaq yerleşse de, çatışma yerinden 90 ve atta 100 kilometr mesafede.
Daa yaqında rusiyeliler pek raat edi. Anbarlarını 80 kilometr mesafege çetleştirgenler, HIMARS ise tam bu mesafege çalışa, rusiyeliler silâ anbarları, tehnika, askerleri telükede degil, dep emin ediler. Amma Storm Shadow aldıq, demek ki, sistematik bir şekilde pek müim işni yapmağa imkânımız bar, kelecek uruş meydanını azırlay bilemiz. Duşman ne qadar zayıf olsa, qarşı ücümimiz o qadar semereli ve az masraflı olur. Ukrayına ordusınıñ bütün ğayretleri şimdi mında kösterile, dep tüşünem. Ukrayınanıñ qarşı ücümi şimdi – topraqlarnıñ azat etilüvinden daa çoq Putin ordusınıñ küçüni yoq etüv aqqında.
MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
