KEFE – Eviñizniñ yanından keçesiñiz, ot üstünde ise eki kiçik sarı topçıq yata. Ne yaparsıñız? Organlarğa acele telefon etip, provokatsiya olğanını bildirmek kerekmi? Sorarsıñız: kimniñ aqlına kelir böyle bir şey yapmağa? Kefede bir «cemaatçı ve bloger» bar. Kirişte kamerası bar, 15 yaşında qızçıq bu toplarnı atqan videonı poliske berdi. Ve polis qıdırıp başladı, «taptı» da, qızçıq qomşu qasabada Ukrayınağa qoltutuv graffitisini yapqan eken ve, añlağanıñız kibi, Ukrayınadaki «koordinatorlarnıñ» emrinen.
Endi sarı renk de açuvlandıra
Ebet, bu graffiti artıq yoq. Divarlarda tek narkotik satışı yazuvları aylarnen ola. Qız 15 yaşında, çağına yetmegen, onı vandallıqta qabaatlaylar, mesele blogerniñ azbarındaki bu topçıqlarda, ğaliba. Ya beyaz tüste olsa – o qadar açuvlanır edimi? Sarı-mavı olmadı da. Endi sarı renk de açuvlandıra. Yani bir yerge çıqqanda küzgüge baqıñız: üstüñiz sarı degilmi? Çamaşırnı da teşkermek kerek, mavı olmasın. Ne olur, ne olmaz.
Bu endi Sovetler Birligi de degil, daa beter. İnternet – qorqunç şey
Bu endi Sovetler Birligi de degil, daa beter. İnternet – qorqunç şey, TASSqa esaslanıp, Qırımdaki vaziyet aqqında bir şey yazsaq, 300 biñ para cezası kele. Ya ne içün? Yani resmiy kanallar yaza bile, bir şey olmay, amma sen, ayneci böcek Facebook ya da Vkontaktede bir şey yazsañ, – al para cezasını. Evelden sovetlerde «Pravda» gazetasına esaslanıp yazsañ, bir şey olmay edi.
Endi yerli Qırım akimiyeti de çağıra: Çonğar köprüne ne olğanını aytmağa kerekmey.
Çünki «yol, köpür, areket ve keçiş noqtaları aqqında malümat – Qırım ve Herson vilâyetiniñ Naqliyat nazirligi ve müessiseleriniñ işi eken». Köpürden keçken olsañız bile, indemeñiz: yazmaq ve foto paylaşmaq yasaq.
Ya ne oldı, bu ne telâş? Dost ve qomşularımızdan sorayım. «Ya!» ya da «Çaresini taparmız...» cevaplarını eşitem.
Qırım stabil: fiyatlar arta. Benzin, sebze. Sebze – hucur bir şey. Avgust ayı, qartop paalılaşmasa da olur deysiñ. Amma fiyatı arta.
Soñki afta er kün saba internette ilân körem, bugün anda-mında, Eski Qırımda silâ patlatacaq ekenler. Ve patlatalar, patlav seslerini biz de eşitemiz. Ola edi, amma ayda bir. Şimdi ise er kün. Mına saña.
O qadar snarâd qaydan çıqa? Er kün patlatmasalar olmazmı? Cevapsız sualler
O qadar snarâd qaydan çıqa? Er kün patlatmasalar olmazmı? Cevapsız sualler. Halq ise telâşlana: patlavlar boşuna degil! Birinci eşitkenlerim: Ukrayınadan dronlar uça, olarnı patlatalar. Amma akimiyet ne içündir bunı aytmay, telâşlanmañız, dep ayta, özümiz patlatamız deyler.
Daa bir mesele: benzin paalılaşa, bazı vaqıtları da olmay. Aqyarda yaqarlıq fiyatı ne içün arta? Ne içün bazı yaqarlıq stantsiyalarında bazı benzin çeşitleri yoq, Aİ-95 olğanı kibi?
Bu suallerge Mihail Razvojayev böyle cevap bere. «Şimdi Aqyarda yaqarlıq problemi yoq. Ne içün bu mesele peyda oldı? Çünki Qırım yarımadasında yaqarlıq deñiz naqliyatınen ketirile. Furtuna olsa, deñiz naqliyatınıñ seferleri sınırlana», – dep ayttı vali.
Turistler çoq olmasa da, bar.
Bu da eñ yaqın afta, soñ keterler, ve çıplaq bedenlerini Qırımda köstermeycekler. Sıcaq, sarı suv plâjda daa bir qarar, Keriçte yalı cılavuq tolu. Küz kelsin!
Armen Haçaturov, kefeli bloger (müellifniñ adı ve soyadı telükesizlik maqsadınen deñiştirildi)
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
