Rusiye kontrolindeki Qırım yolbaşçısı Sergey Aksenov keçken künü yarımadada 375 COVID-19 hastası qayd etildi, bir kün evelsi qayd etilgen hastalarnıñ sayısı 14 insan az edi, dep bildirdi.
«273 hasta tibbiy yardım içün muracaat etkende qayd etildi, 99 kişi daa evel qayd etilgen hastalarnen alâqada oldı, 3 hasta çetelden keldi. Bir künde 282 insan yahşı oldı, bütün müddet devamında 51 795 insan tüzeldi», – dep bildirdi Aksenov içtimaiy ağlardaki saifesinde.
Tünevin saba akimiyet 361 yañı koronavirus hastası qayd etildi, dep bildirdi. Qırımnıñ Rusiye sağlıq nazirligi avgustnıñ 3-nde 15 koronavirus hastası vefat etti, dep bildirdi.
Avgustnıñ 4-nde Qırım ve Aqyardaki Rospotrebnadzor idaresiniñ yolbaşçısı Natalya Penkovskaya COVID-19 ile küreş operativ ştabınıñ toplaşuvında Qırımda bir afta devamında yetmiş üç hasta koronavirustan vefat etti – bu pandemiya devamında eñ büyük raqam oldı, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
