Link açıqlığı

Saatnıñ esas haberi

Qırım akimiyeti Petro Poroşenkonıñ Qurban bayram tebrikine cevap berdi


Qırımnıñ Rusiye parlamenti spikeriniñ birinci muavini Yefim Fiks

Qırımnıñ Rusiye parlamenti spikeriniñ birinci muavini Yefim Fiks beşinci Ukraina prezidenti, şimdiki halq deputatı Petro Poroşenkonıñ Qurban bayram tebrikine cevap berdi. Poroşenko Qırım Ukraina kontroli altına tez qaytacaq, dep ayttı.

Poroşenko qırımtatarlar Qurban bayramını tezden Ukrainağa ait Qırımda qayd etecegine işana, dep qayd etti.

«Beraber ğayret kösterip, istilâcını mıtlaqa yeñermiz ve Qırımnı evge qaytarırmız. Ve tezden Ukrainağa ait Qırımda tamır qırımtatar halqı Qurban bayramını serbest qayd etecek. Kelecek sene – Bağçasarayda! Qırım – Ukrainadır!», – dep yazdı o, Facebookta.

Buña cevap bergen Fiks «Qırım Ukrainanıñ bir qısmı olmaycaq», dep bildirdi. «Petro Poroşenko bir şey ayttı ve endi bütün Qırım «qaynay». Qırım Ukrainanıñ bir qısmı olmaycaq. Jeglov aytqanı kibi: «Mında Şarapovnı degil, qalaç teşigini alırsıñ». Poroşenko da öyle – Qırım degil, teşik alır. O, (Poroşenko – muar.) raat olsun», – dep bildirdi Fiksniñ aytqanlarını «Krım24» telekanalı.

Kreml, Rusiye 2014 senesi işğal etken Qırımnıñ topraq mensüpligi meselesi muzakere etilmeycek, dep bildirgen edi. 2014 senesi AB ve ABD Qırım işğali ve Rusiyeden destek alğan «DNR» ve «LNR» tarafından bir qısmı işğal etilgen Donbastaki vaziyet sebebinden Rusiyege qarşı sanktsiyalar kirsetti.

Qırımda iyülniñ 20-nde Qurban bayramı munasebetinen raatlıq künü ilân etildi. Yarımada camilerinde ve esas Ukrainada bayram namazları qılındı.

Ukraina prezidenti Volodımır Zelenskıy musulmanlarnıñ Qurban bayramını tebriklep, eyilik ve amanlıq tiledi. Ukraina ombudsmanı Lüdmila Denisova Qurban bayramında Rusiye apsinde tutulğan qırımtatarlar aqqında hatırlattı.

Qurban bayramı – musulmanlarnıñ eñ büyük bayramlarından biri olıp, Mekkege acılıqnıñ soñuna kelgenini temsil ete. Oraza Bayramından 70 kün keçken soñ qayd etile.

Qurban Bayramı büyük meydanlarda cemaat ile qılınğan bayram namazından başlana ve ondan soñ qurban çalına. Bu ananeniñ tamırları Allahnıñ İbraim peyğamberge oğlu İsmailni qurban ketirmege bermeyip, qoynı kesmege buyurıp toqtatqanından kele.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG