Ukraina Yuqarı Radasınıñ insan aqları vekâletlisi Lüdmila Denisova iyülniñ 20-nde musulmanlarnıñ Qurban bayramını tebriklep, Rusiye apsinde tutulğan ekseriyeti qırımtatarı olğan Qırım musulmanları aqqında hatırlattı.
«Ne yazıq ki, er kes onı (Qurban bayramını – QA) qorantasınıñ yanında ve Ukraina toprağında qarşılamay. Biñlernen qırımtatarı işğalci memleketniñ yapqanları sebebinden yarımadanı terk etmege mecbur edi. 93 qırımtatarı Rusiye tarafından siyasiy sebeplerden taqip etile. 78-i işğalci memlekette qanunsız apiste tutula: 36-sı endi mahküm etildi, 42-si tahqiqat altında qala», – dep qayd etti Denisova.
O, bayramda «qaviy iman, kesilmegen ümüt ve tuvğanlarnıñ sıñırsız destegi olmasını» tiledi.
«Qırımtatarlar – serbest olmaq ve vatanında yaşamaq aqqı oğrunda küreşken pek küçlü ve iradeli halqtır», – dep qoştı Denisova.
Bundan evel Ukraina prezidenti Volodımır Zelenskıy musulmanlarnı Qurban bayramlarınen tebrikledi.
Qırımda iyülniñ 20-nde Qurban bayramı munasebetinen raatlıq künü ilân etildi. Yarımada camilerinde ve esas Ukrainada bayram namazları qılındı.
2020 senesi iyülniñ başında BM insan aqları Yuqarı komissarı Michelle Bachelet Qırımdaki insan aqları vaziyetine dair maruzasını taqdim etip, yarımadada işkence qullanıla ve söz serbestligi sıñırlanıla, dep bildirdi.
2021 senesi iyünniñ başında BM Ukraina insan aqları monitoring missiyası Qırımda tutulğan ve apiske alınğanlarğa qarşı Rusiye uquq qoruyıcıları tarafından qullanılğan işkence usulları devam ete, dep qayd etken edi.
Rusiye böyle malümat ve maruzalarnı er vaqıt red ete.
