Ukraina prezidenti Volodımır Zelenskıy Ukraina musulmanlarını bu yıl iyülniñ 20-nde qayd etilgen Qurban bayramınen tebrikledi.
«Memleketimizniñ medeniy ve diniy ayatınıñ ayırılmaz parçası olğan iman, feda etüv ve cümertlik bayramı olğan Qurban bayramı munasebetinen can-yürekten hayırlavlarımnı qabul etiñiz», – dep aytıla Prezident ofisiniñ saytında derc etilgen tebrik haberinde.
Zelenskıy bütün musulmanlarğa eyilik ve amanlıq tiledi.
«Tuvğanlarıñız ve yaqınlarıñız sağlam ve bahtlı olsun», – dep aytıla hayırlavda.
Qırım Muhtar Cumhuriyeti musulmanları diniy idaresi iyülniñ 20-nde saba Kyiv camisinde bayram namazı qılınacaq, dep bildirdi.
Rusiye kontrolindeki Qırım ve Aqyar musulmanları diniy idaresiniñ yolbaşçısı Emirali Ablayev eki yıldan berli koronavirus pandemiyası Qırım musulmanlarına Mekke ve Medinege acılıqqa barmağa imkân bermey, dep qayd etti.
Qırımda iyülniñ 20-si raatlıq künü olaraq ilân etildi.
Qurban bayramı – musulmanlarnıñ eñ büyük bayramlarından biri olıp, Mekkege acılıqnıñ soñuna kelgenini temsil ete. Oraza Bayramından 70 kün keçken soñ qayd etile.
Qurban Bayramı büyük meydanlarda cemaat ile qılınğan bayram namazından başlana ve ondan soñ qurban çalına. Bu ananeniñ tamırları Allahnıñ İbraim peyğamberge oğlu İsmailni qurban ketirmege bermeyip, qoynı kesmege buyurıp toqtatqanından kele.
