İşğal etilgen Qırımda söz serbestligi saasında vaziyet bayağı fenalaştı. Bu aqta Varşavada OSCE-niñ insan ölçüsi boyunca halqara konferentsiyasında "Qırım aq qorçalayıcı gruppasınıñ" halqara adliye boyunca meneceri İrina Baran bildirdi.
Onıñ aytqanına köre, Rusiye akimiyeti yerli sakinlerge basqı aletlerini kenişletti, şu cümleden, Ukrayina tarafdarı mevamını bildirgenlerni para cezasına çekmege ve azatlıqtan marum etmege imkân bergen yañı qanunlarnı tayin etti.
Qayd etilgenine köre, aq qorçalayıcılar Rusiye ordusını "areketsizleştirgen" qırımlılarnıñ 850-den ziyade memuriy mesüliyetke çekilgenini qayd etti. Böyle areketlerge içtimaiy ağlarda Ukrayina bayraqlarınıñ yerleştirilmesi, Qırım işğal etilgen topraq ya da Ukrayina toprağı olğanı aqqında aytılmaları, "Ukrayinağa şan-şeref" ve "Aqmescit bekley" kibi şiarlar kirsetildi.
Baran şunı da hatırlattı ki, bugünki künde Qırımdaki siyasiy sebeplerden açılğan davalar boyunca azatlıqtan marum etilgen 220-den ziyade Ukrayina vatandaşı bar.
İlhaq başlağanından berli deñişim neticesinde tek 10 siyasiy mabüs azat etildi, olardan tek bir qadın. Bu sebepten uquq qoruyıcı Rusiye apishanelerinde tutulğan diger qadın siyasiy mabüslerniñ azat etilmesi içün ğayret köstermege çağırdı.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını "areketsizleştirgenleri" içün yaqalana ve memuriy ve cinaiy mesüliyetke çekile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
