Hersonda qırımtatar genotsidiniñ qurbanlarını añma künü «Hatırlaymız» adlı hatıra aqşamı keçirilecek. Tedbirler mayısnıñ 15-nde DahaBraha ukrain etno-gruppası ve qırımtatar asıllı ukrain yırcı Jamalanıñ ve qırımtatar oyun gruppalarınıñ iştirakinen ötkerilecektir.
Bu aqta tedbir teşkilâtçıları – «Küreş» qırımtatar medeniy merkezi», «Gogolfest», USAID halqara inkişaf ABD agentligi ve «Nova ğeneratsiya» – Qırım.Aqiqatqa bildirdi.
«Hatıra aqşamı 1944 senesi mayısnıñ 18-nde qırımtatar halqı oğrağan facialı adise-vaqialarğa bağışlana. Mahsus vaqianı rejissör Vlad Troitskiy teşkil etecek ve o, Hersonnıñ merkezindeki Azatlıq meydanında ötkerilecek», – dep haber ete teşkilâtçıları.
«Küreş» qırımtatar medeniy merkezi hayriye teşkilâtınıñ inkişaf müdiri İbragim Suleymanov qırımtatar halqı sürgünliginiñ qurbanları hatırasına keçirilecek aqşamnıñ yañı format ğayesi aqqında tarif etti: «Bir qaç yıl evelsi zenaatdaşlarımız, hususan Liliya Caksim ve Susanna İzmaylovanen mayısnıñ 18-nde qırımtatar halqı genotsidiniñ kününen bağlı tedbirlerni muzakere etken edi. Ve bir hulâsa çıqardıq, ananeviy mitingler artıq o qadar semereli degil. Çoq tüşündik ve hulâsa çıqardıq: qırımtatar halqı bu 77 yıl devamında körgen acı ve facianı köstermek içün insanlarğa meraqlı olacaq, millet mensüpligine baqmadan, insanlarnı birleştirecek formatnı uydurmaq kerek».
Onıñ aytqanına köre, tedbirniñ maqsadı «diqqat celp etmek, halqlar arasında bir tarihnıñ añlamasına yardım etmek, 1944 senesi mayısnıñ 18-nde olğan facia aqqında haberdar etmek» ola.
Teşkilâtçılarnıñ qayd etkenine köre, tedbir Ukraina Sağlıq nazirliginiñ koronavirus pandemiyası sebebinden olğan sıñırlavlarğa uyğun şekilde ötkerilecektir.
Qırımtatar halqı genotsidiniñ qurbanlarını añma künü
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
