Rusiye nezaretindeki Aqmescitniñ Kiyev rayon mahkemesi mayısnın 31-ine qırımtatar faali, cemaat jurnalisti Lütfiye Zudiyevanıñ davası boyunca mahkeme oturışını tayinledi. Onı, Rusiye Memuriy cinayetler kodeksiniñ 20.3 maddesine köre – yasaqlanğan timsallerniñ numayışı – qabaatlaylar.
Qırım.Aqiqat mühbiri bildirgeni kibi, dava malümatında 2014 yılı aprelde yapılğan Tagir Minibayevniñ yazısı keçe, o internet yazıda Zudiyeva qayd etilgen edi.
“Böyle tutıp almalarğa ve davalarğa ilk işaretlerge kibi baqam, çoqusı başta memuriy davalardan keçip, soñra ciddiy cinaiy davalarğa oğray edi. Bu beklenilgen bir şey. Yazıq ki, amma Qırımda vaziyet inkişafınıñ başqa yolunı körmeyim. Amma quvetçiler böylece qadınlarnı tutıp almasalar, olarğa daa yahşı olur. Bu artıq şamata ve provokatsiya”, - dedi faal.
Qadın, advokatı Emil Kurtbedinov oña tek tibbiy teşkerüv keçirilgeninden soñ yiberilgenini bildirdi.
Rusiye quvetçileri Lutfiye Zudiyevanıñ telefonını tutıp aldı, dep ayta faal.
Rusiye quvetçileri mayısnıñ 30-nda eki qırımtatar faalini tuttı: aq qorçalayıcı ve vatandaş jurnalisti Lutfiye Zudiyevanı ve Bağçasaraydaki «Hizb ut-Tahrir davası» mabüsiniñ ömür arqadaşı, «Qırım balalığı» teşebbüsiniñ koordinatorı Mümine Saliyevanı.
Ekisi de Rusiye Memuriy cinayetler kodeksiniñ 20.3 maddesine istinaden qabaatlana – yasaqlanğan timsallerniñ numayışı. İşbu madde boyunca memuriy apis cezası berile.
Bundan evel qırımtatar faali, Bağçasaraydaki ekinci «Hizb ut-Tahrir davası» mabüsiniñ ömür arqadaşı, «Qırım balalığı» teşebbüsiniñ koordinatorı Mümine Saliyeva Aqmescitteki Rusiye Ekstremizm ile küreş merkezinden yiberildi.
Faalniñ aytqanına köre, oña qarşı Rusiye Memuriy cinayetler kodeksiniñ 20.3 maddesine istinaden – yasaqlanğan timsallerniñ numayışı – memuriy dava açıldı.
Al-azırda Qırım ve qomşu Rusiyeniñ müessiseleri bir de bir izaat bermediler.
