Qırımtatar faali, Bağçasaraydaki ekinci «Hizb ut-Tahrir davası» mabüsiniñ ömür arqadaşı, «Qırım balalığı» teşebbüsiniñ koordinatorı Mümine Saliyeva Aqmescitteki Rusiye Ekstremizm ile küreş merkezinden yiberildi.
Faalniñ aytqanına köre, oña qarşı Rusiye Memuriy cinayetler kodeksiniñ 20.3 maddesine istinaden – yasaqlanğan timsallerniñ numayışı – memuriy dava açıldı.
«Protokol tizildi, Fevralskaya soqağındaki narkologiya merkezine yol aldıq, anda içki ve narkotik qullanmağanıma dair teşkerüvden keçtim. Tutuluv protokolınıñ kopiyasını bergenler. Mahkeme yarın saba saat 9:30-da olacaq», – dep tarif etti Saliyeva «Qırım birdemligi» cemaat birleşmesi derc etken videoda.
O, tutulğanını oña ve apiske alınıp Aqmescit SİZOsında tutulğan aqayı Seyran Saliyevge qarşı yapılğan basqı olaraq tanıy. O, Bağçasaraydaki «Hizb ut-Tahrir davasınıñ» mabüsi ola.
Rusiye quvetçileri mayısnıñ 30-nda eki qırımtatar faalini tuttı: aq qorçalayıcı ve vatandaş jurnalisti Lutfiye Zudiyevanı ve Bağçasaraydaki «Hizb ut-Tahrir davası» mabüsiniñ ömür arqadaşı, «Qırım balalığı» teşebbüsiniñ koordinatorı Mümine Saliyevanı.
Ekisi de Rusiye Memuriy cinayetler kodeksiniñ 20.3 maddesine istinaden qabaatlana – yasaqlanğan timsallerniñ numayışı. İşbu madde boyunca memuriy apis cezası berile.
Al-azırda Qırım ve qomşu Rusiyeniñ müessiseleri bir de bir izaat bermediler.
