Qırımda silâ ve patlayıcı maddelerni qanunsız saqlağanında qabaatlanğan ağır hasta qırımtatar faali Edem Bekirovnı Ermeni Bazarğa çıqara bileler, anda onıñ içün şaraitler yoq. Bu aqta Bekirovnıñ advokatı Aleksey Ladin iyünniñ 29-nda «Qırım birdemliginiñ» toplaşuvında ayttı, dep bildire Qırım.Aqiqat mühbiri.
«İmaye içün vaziyetni zorlaştırmaq içün davanı Ermeni Bazarğa yollamağa isteyler, dep tahmin etem. Amma esas mesele şu ki, Qırımda tek bir tahqiqat izolâtorı bar, demek, Bekirovnı Ermeni Bazarnıñ vaqtınca tutuv izolâtorında tutacaqlar, anda ise o qadar hasta adam içün şarait yoq. Bekirov tahqiqatçığa ayttı: «Dava Ermeni Bazarğa yollanılsa, meni anda tek küçnen çıqaracaqsıñız». Çünki bu ölümnen bir ola», – dedi Ladin.
Advokat iyülniñ 3-nde Qırım Yuqarı mahkemesi imayeniñ Bekirovnıñ apis müddetini uzatuv qararına qarşı temyiz arizasını qanaatlendirip, onıñ sıñırlav tedbirini deñiştirecek, dep ümüt ete.
«Bu dava Qırımdaki mahkeme işleri içün istisna olacaq ve Bekirovnı ev apsine yollarlar dep belli bir ümütler bar», – dep ayttı o.
Bekirovnıñ advokatı cinaiy dava malümatlarını ögrenmege başladı, yaqın vaqıtta onı mahkemege yollaycaqlar, dep bildirdi.
«Dava malümatında yañı bir şey yoq. Edem Bekirovnı gizli şaatqa aman-aman 14 kg silâ ve patlayıcı madde bergeninde qabaatlaylar. Hatırlatam, birinci derece saqatı, ayaqsız, o vaqıt yaqında keçirgen infarkt ve yürekten ameliyat olğan kişi bir kilogrammdan ziyade aqibetlersiz köterip olamaz edi, dep başından berli aytam. Qabaatlav – olmaycaq bir şey», – dedi advokat.
Bu afta başında Bekirovnı Aqmescit SİZOsında ziyaret etken advokat Aleksey Ladin qırımtatar faali «qan şekeri yükselir dep, pek az aşay», dep bildirgen edi.
Rusiye prokuraturası, Rusiyeniñ cezalarnı yerine ketirüv federal hızmeti Bekirovnıñ beyanatlarını izaatlamay.
İyünniñ 11-nde Avropa insan aqları mahkemesi Qırımda silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ davası boyunca qarar çıqardı. Mahkeme onıñ hastahanege acele yatqızılmasını talap etti.
Daa evel Avropa insan aqları mahkemesiniñ qararına baqmadan, Qırımdaki Rusiye Federal telükesizlik hızmeti idaresiniñ üyken tahqiqatçısı İvan Romanets işğal etilgen Qırımnıñ Aqmescit SİZOsında tutulğan qırımtatar faali Edem Bekirovnı hastahanege yatqızmağa razı olmağanını bildirgen edi.
Qırımnıñ Rusiye prokuraturası FSBniñ Bekirovnı hastahanege avuştırmamaq qararına qoltuttı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
