Ağır hasta faal Edem Bekirovnıñ imayesi ve ECHR talap etken hastahanege qoyuluvını FSB lâğu etti ve Rusiye nezaretindeki Qırım prokuraturası buña qarşı bir şey yapmaycaq.
Bu aqta Bekirovnıñ advokatı İslâm Velilâyevnıñ muracaatına cevap olaraq kelgen yazı cevapta bildirile, onıñ kopiyası Qırım.Aqiqatnıñ elinde bar.
"Prokuror cevabı içün esas yoq", - denile beyanatta.
Prokuraturada, Bekirovnıñ SİZOnıñ tibbiy blokunda, ekimlerniñ nezareti altında bulunğanını bildirdiler ve o "kerekli ilâçlarnı ala ve diyetik yemegi bar", dep qayd eteler.
Bundan ğayrı, müessise, faalni tevqif etilgeninden berli "bir qaç kere ekimler baqa edi", dep qaştılar. Prokuraturağa köre, Bekirovnıñ aqları bozulmadı.
Daa evel Avropa insan aqları mahkemesiniñ qararına baqmadan, Qırımdaki Rusiye Federal telükesizlik hızmeti idaresiniñ üyken tahqiqatçısı İvan Romanets işğal etilgen Qırımnıñ Aqmescit SİZOsında tutulğan qırımtatar faali Edem Bekirovnı hastahanege yatqızmağa razı olmağanını bildirgen edi.
İyünniñ 11-nde Avropa insan aqları mahkemesi Qırımda silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ davası boyunca qarar çıqardı. Mahkeme onıñ hastahanege acele yatqızılmasını talap etti.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
